Mizoramah 'Bolero Neo' tlangzarh a ni ta

Mahindra Bolero chhuak thar, Bolero Neo chu nimin khan Mahindra Mana Motors, Bawngkawnah khuh hawn a ni a, a duh apiang lei theiha chhawp chhuahin a awm tawh.

Mana Motors hotupa Dr Franklin Lalrinngheta chuan thla hmasa lam aṭang khan he motor thar hi tlangzarh an tum tawh tih sawiin hrileng vangin an tlangzarh lawk thei loa, niminah khan media mi, mi tlemte hmaah an tlangzarh ta a ni.

Vanlalmuana, Info Cars chuan review neiin,"Bolero hmasa kha tlangzarh a nih aṭanga kum 10 chhung zet kha India rama SUV hralh kal ber a ni," tia sawiin, maktaduai 1.3 lai hralh a nih thu a sawi. Tuna chhuak thar 'Bolero Neo' hi a changkangin a engine a rintlak hle tih a sawi a, technology changkang zawk hmangin, a chhung chuan a nawm zawk a ni, a ti.

Italian company design niin a landan a danglam nasa tawh a, mahse danglam tak ni chung siin Bolero a nihna erawh a hloh lo niin a sawi bawk.

Variant hrang hrang awmin a man chu hetiang hi a ni:

N4 - Rs 9,39,418, N8 - Rs 10,39,417, N10 - Rs 10,91,318, N10(opt) - Rs 11,71,108