Fairelbel mipuiin an hlût; Rs Nuai 19 chuang hmu chhuak

LPS leh Zonet ṭangkawpin Aizawl Municipal huam chhunga hrileng avanga harsatna tawkte ṭanpuina tura an buatsaih 'Fairelbel', Zirtawpni zana neih tak chu mipuiin an hlût hle a, Rs. 19,41,070 lai an hmu chhuak.

'Fairelbel' programme hi Zirtawpni zan dar 8-ah khan ṭanin Rini Hlondo chuan hnehsawh takin a kaihruai a, zaithiam chuai thei lo Vanlalsailova chuan show hawngin darkar li vel hun hman a ni. Mipuiin an hlût a, LIVE Phone-In lam pawh an lun rem rem hle.

Veng hrang hrang Local Level Task Force-te video clip rilru hneh tak tihlan a ni. LPS 1, Zonet Zawlbuk leh YouTube lamah live-a pek chhuah niin, YouTube kaltlanga thlirtu pawh an ṭhahnem hle a ni.

He program ah hian Frederick Lalrindika, Jeje Lalpekhlua, Vanlalsailova, Benjamin Sum, Sangtei Khuptong, Fiona Pachuau, K. Hminga, Henry Varte leh Adeline Pachuau-te chuan hun an hmang a, LIVE Phone-In hmanga biak theih turin anni hi an ṭhu a, zaithiam inlante hian thiam takin thlirtute an awi bawk.

Zaithiamte zai a ngaihnawm bakah musician ṭha tak takin an zai an rem bawk a, thlirtute mit leh beng a tlai a, mipuiin an hlût a, sum pawh a lut ṭha hle.

Account katlangin Rs. 18,95,070 lai sum a lut a, Zonet office lamah Rs. 22,500 dah a nih bakah LPS Office lamah Rs. 23,500 dah a ni bawk.

Ṭanpuina a la pek zel theih
'Fairelbel'-ah hian pawisa a la chhun luh reng theih a, Inrinni lo awm leh tur thleng hian hun an la hawng. Chumi hnu lamah chuan ṭanpui ngaite hnenah ṭanpuina hi an sem chhuak dawn a ni.