Switchfoot album thar

Grammy award hial lo dawng tawh Christian rock band Switchfoot chuan Zirtawpni khan an studio album 12-na 'Interrobang' an tlangzarh.

'Interrobang' hi streaming platform hrang hrangah ngaithlak theihin a awm tawh a, hla 11 awmin album an tlangzarh hma hian single-in hla pali an tichhuak tawh a ni.

Switchfoot hian kum 1997 khan an album hmasa ber 'The Legend of Chin' chu an tlangzarh a, kum 2019-a 'Native Tongue' an tlangzarh hnua an album tihchhuah leh hmasak ber chu 'Interrobang' hi a ni.

An bulṭan tirh lamah chuan Christian music scene-ah chuan hriat hlawh viau mah se mainstream lamin an hre lutuk lo. Mahse kum 2002-a 'A Walk to Remember' film hit takah khan an hla pali lai an hmang a, chuta ṭang chuan hriat an hlawh lehzual. Kum 2003-a an album tihchhuah 'The Beautiful Letdown' phei chu copy maktaduai 2.5 chuang zet an hralh hial.