Box Office : Black Panther khum thei la awm lo

Tun hnaia tlangzarh Fantasy/Science fiction film Black Panther chu sum lakluh tam lamah khum thei an la awm lo. Kar liamta chhung khan US-ah ringawt $mtd 108 zet a lalut leh a, Box Office-ah dinhmuin sang ber a luah zui zel.

Black Panther hi kar khat chhungain theater 4,040 zetah chhuah a ni a, hetaṭanga a sum lakluh hi $mtd 100 chuang zet a ni. Tlangzarh aṭanga kar hnih chhunga sum lakluh tam lamah tluk loh pakhat chiah a nei a, chu chu Star Wars: Force Awakens a ni. Star Wars hian tlangzarh aṭanga ni 10 lek chhungin $mtd 400 zet a la lut tling a, record ding lai a ni. Star Wars hian tlangzarh kar hnihnah $mtd 149.2 zet a lalut a ni. Black panther sum lakluh zat $mtd 108 hi Jurassic World ($mtd106.6) leh The Avengers ($mtd 103.1)-ten an hnaih hle. Hetih rual hian Black Panther hian Wonder Woman, Justice League leh The Fast and the Furious-te chu a rawn khum ta a ni.

Box office-a sum lalut tam pahnihna chu February 21-a tlangzarh Crime film 'Game Night' a ni. Game Night sum lakluh zat hi $mtd 17 a ni a, Black Panther sumlak luh zat a pha lo hle. Sum hailut hnem pathumna chu Peter Rabbit niin, a sum lakluh hi $mtd 12 a tling. A hnuiah hian Annihilation leh Fifty Shades Freed-te an awm. Fifty Shades Freed hi February 9 khan tihchhuah ṭan ani a, Box Office-a a sum lakluh tawh zawng zawng chu $mtd 274.4 a tling tawh.

Hun eng emaw chen dinhmun sang ber lo luah tawh Jumanji: Welcome to the Jungle chu sum lalut tam zingah a tel leh a, a sum hailuh erawh a tlahniam ve hret hret. Kar liamta chhung khan $mtd 5 lalutin parukna a ni a, a sum thawhchhuah tawh zat hi $mtd 909.2 zet a ni. The Greatest Showman pawh sum lalut tam zingah a lang leh a, $mtd 3.4 lai a la thawk chhuak. Top 10-ah hian The 15:17 to Paris leh Every Day an lang bawk a, tun hnai film chhuak thar Early Man chu hnu khartu a ni.