Cheryl a ṭawng chhuak

English singer Cheryl Ann Tweedy leh a bialpa Liam Payne-te inṭhen chungchang hi tunlai khawthlang media-te chaw tui ber pakhat a ni hial awm e. An lar dun bawk a, an chanchin pawh hian ngaihven a hlawh hle a ni. Hetih lai hian anmahni lamin engmah an sawi chian duh loh avangin thu leng vak a tam phah a, awih ber tur pawh hriat harsa tak a ni. Thu chiang hriat a chakawm tehlul nen, Cheryl chuan nu ber nia nau pawm chu chona thar a nih thu a sawi daih a, Payne nena an inkar thu a sawi lang lo.

Cheryl Cole tia kan hriat ṭhin hian kum 2017 kha a tan chuan chona hautak tak a hmachhawn kum a nih thu a sawi a, hun harsa tak a paltlang niin a sawi. Media pressure vanga a buai loh thu sawiin, a fapa thla 11 mi chu a ngaihtuah ber thu a sawi. Cheryl hian a bialpa Liam Payne lakah nikum khan fa a hring a, chhungkaw nu ber chan a chang mek. Hetiang a nih tak nuaih avang hian zai lamah pawh a insawrbing thei rih lo a, an inṭhen boruakin a chiah hneh em bawk avangin zai lam pawh a lang vakin a rinawm lo.

'Fight for this Love' hitmaker hian Payne chu a sawi chhe duh chuang lo a, mi ṭha tak a nih thu a sawi. Kum hnih chuang a lo zui tawh nen hian inṭhen mah se, mipui hmaah a rel zui lem lo a ni. Hetih lai hian Payne nena an chenna in chu chhuahsan a tum nia tarlan a ni a, a agent-te pawh chenna dang dapsak turin a thurawn a pe tawh niin an sawi.