Sridevi vui liam a ni ta

Indian actress lar Sridevi Kapoor chu nimin khan vuai liam a ni ta a, amah ngaisangtu leh milar tam takin an thlah liam a ni. Sridevi hi kar kalta Inrinni khan Dubai-ah lungphu chawlin a thi thut a, Bollywood a barakhaih hle.

Sridevi ruang hi Thawhṭanni khan Dubai aṭanga India panpui tura tih a ni a, mahse tihkhawtlai a ni. A thih aṭanga darkar 70 chuang zet a liam hnuah Thawhlehni khan Mumbai thlenpui chauh a ni. mumbai-ah hian mitam takin an lo hmuak a, venhimna pawh khauh taka kenkawh a ni. A ruang hi Chhatrapati Shivaji International Airport aṭangin a chenna Green Acres, Lokhandwala-ah lakzui a ni a, nimin chawhnu khan vui liam a ni ta a ni.

Vui nih hma hian a ruang hi ngun taka endik a ni. Forensic report aṭnga a lan dan chuan vanduai thila tuia tla hlum nia tarlan a ni a, chhuizui hna pawh tihtawp a ni. A ruang endiktute chuan nikhaw hreloa a awm hnuah bathtub-ah a tlu lut a, a thizui mai niin an sawi.

Sridevi hi an thlenna hotel bathtub-ah nikhaw hreloa a awm hmuh a ni a, a hnulawkah a thi zui nghal a ni.

Vuitu a ngah
Sridevi hi Bollywood-ah chuan a aia lar leh hlawhtling an awm bik chuang lo ang tih ngam a ni a, a thih thu pawh hian Bollywood khawvel a barakhaih hle. Lainattu a ngah hle a, a mah vuina hunah pawh hian milar tel an ṭhahnem hle a ni. Bollywood-a hming lang sar tak tak - Aishwarya Rai Bachchan, Deepika Padukone, Sushmita Sen, Madhuri Dixit, Kajol leh Karisma Kapoor-te chu a ruang kiltu zingah an tel. Sonam kapoor, John Abraham, Rajkummar Rao leh a film chan hnuhnung ber 'MOM' a a chanpui Akshaye Khanna-te pawh an inlan a ni. Anni bakah hian Bollywood super star - Shah Rukh Khan, Salman Khan, Akshay Kumar leh Anupam Kher-te pawhin Sridevi hi an vui liam a ni.