Chapchar Kut 2018 : Vawiinah zaithiamte Lammualah an che dawn

Mizote kut ngaihhlut ber Chapchar Kut chu nimin aṭang khan Lammualah hman ṭan a ni a, vawiinah a lawmna pui ber neih a ni ang.

Vawiin hian zing dar 10:30 aṭangin programme ṭan a ni dawn a, zaithiam lar tak tak - hrang hlui deuh aṭanga a tun lai ber berte an inlan dawn.

Mizo Cardinal Choir chuan kumin kut thupui "Sem sem dam dam" tih hla hmangin kut khuh hawnna an nei ang. Anni hi Asia Pacific Choir Games 2017, Colombo-a neihah khan an che ṭha hle a, ram pawn thleng pawha Mizo hming timawitu te an ni.

Mal zai ngaihtlak tur a awm zui dawn a, Esther Lalrinhluii a zai ang. Ani bakah hian Mizo zaithiam langsarte kan hmu dawn a - K.C Run­remsangi, Lalawmpuia Fanai, C.Vansanga, Zorinzuali Khiangte, Israel Lalbiakrema, DJ Lalvenhimi, Rpa Ralte, leh Feli Fanai te an ni nawk a, live-a an perform en duh tan chuan Lammual pan a fuh ang.

Rual u deuh zawkten KC Runremsangi leh C. Vansanga te zai an ngaithla chak ang a, kum lama naupang zawkten DJ-i, Feli Fanai, Israela leh midang zai an hmu chak ang. Anni hi Mizo zaithiam zingah pawh kan neih ṭhat ber berte an ni a, Lammuala mipui kal khawmte awi turin an ṭha tawk.

Hnam zai lama kan zaithiam neih ṭhat R. Lalhmangaihzauli leh Lalbiakhlui Pachau te an inlan dawn. Pipu zai lamah IMFA (Chhimphei duai) te an che dawn a, rimawi tum ngaihthlak tur a awm bawk ang. Central YMA aṭangin khuallam en tur a awm dawn bawk a, kut chhim tura kal khawmte tan chhawnghnawh hun buatsaih a ni dawn bawk.

Nimina kut lawmnaah zaithiam eng emaw zat an lo zai tawh bawk a, YMA, Ramhlun South Branch-ten hawnna hla an sak zawh a, Cindy Lalthanpui a zai. MZI General Headquarters aṭangin zaipawl ngaihtlak a ni, tlai lamah H. Vanlhlana bakah band eng emaw zat an perform bawk a ni.

Ṭhalaite tan Mizo kutpui ber chhim tura Lammual pan hun a ni e.