Taylor Swift tour kick-off ah Cabello?

Taylor Swift chuan May thla khian tour a nei ṭan tawh dawn a, 'Reputation' world tour kick-off ah hian American-Cuban singer Camila Cabello a perform dawn nia sawi a ni. Swift hian tun hnai khan social media lamah Cabello nena an thlaklak dunna pho lang a, fan-te an phur hle.

Cabello hian opening act a chang dawn nia sawi a awm a, he thu an hriat ve leh hian a fan-te chuan tihlawhting tura an duh thu an lo sawi ve nghal. Wembley Stadium-ah Taylor leh Cabello-te hi an perform dun a nih ngat chuan an mahni ngaisangtute tan chuan a aia hmuhchak leh ngaihthlak chakawm tur vaka awm chuang awm lo e.

Hetih lai hian Taylor leh Camila-te hi an la ṭawng chhuak lo a, a thleng ngei ang tih a la sawi theih loh. Tun hnaia promotional video an tihchhuah aṭanga he thil hi lo irh chhuak a nih avangin, rin loh ngawt theih a ni bik lo.

Taylor Swift hian a album 'Reputation' tih larna turin May 8 aṭang khian tour a nei dawn a, Glendale, Arizona-ah bul a ṭan ang a, Seattle, Toronto, Kansas City, Philadelphia leh khawpui dangah te concert a neih hnuah, New Zealand-ah November 9 khian tour kharna hi neih a ni ang.