Chapchar Kut-ah zaithiamten lawm an hlawh : H. Vanlalhlana a la tar lo, Feli Fanai pheichheh a mawi!

Mizote kut ngaihhlut ber Chapchar Kut chu hmun hrang hrangah lawm a ni a, a lawmna pui ber chu Lammualah neih a ni. Ni hnih chhung awh kut lawmnaah hian zaithiamten lawm an hlawh a, kut tihlawhtlingtu zinga mi an ni. Mizo mipa zaithiam zinga daih rei ber pawl H. Vanlalhlana'n a la tar lo tih a pho lang a, Feli Fanai pawhin a pheichheh mawi a khai leh bawk.

Chapchar kut lawmna pui ber nimina neihah tunlai zaithiam lar kan neih ṭhat zinga mi - Zorinzuali Khiangte, Israel Lalbiakrema, DJ Lalvenhimi, Rpa Ralte leh Feli Fanai te an perform a, mipui chawk hlimtu ber an ni. Khua a ṭhat avangin a lum deuh a, mipui pungkhawm erawh an tlem phah lo.

Chawhnu herah zaithiam te hian kalkhawm te hi zaiin an awi a, stage an lawn aṭangin mipui thawm a ring nghal hle. Zorini leh Israela ten boruak an vaw hot ṭha a, a hnua Feli Fanai a rawn ding chhuak ve leh. Feli Fanai hian a hla hit 'Pheichheh mawi i khai ang' tih chu a rawn thlawh chhuak a, amah ṭawiawm turin lam­­thiam an rawn pen chhuak bawk.

Feli hian a bul ṭan nan Siam­thangi Hauhnar hla 'Val to lo' tih chu a rawn sa, a sa tluan lo thung. Hemi hnu hian a hla thulkhung 'Pheichhe mawi i khai ang' tih music a rawn ri a, mipui lam an sapatal. Lammuala pungkhawmten nuam an ti a, kut chhimtuten an kham lo hle.

K.C Runremsangi leh C.Van­sanga te pawhin mipui lawm an la hlawh reng a, Lallawmpuia Fanai, RP-a Ralte leh zaithiam dangte pawhin mipui an chawk hlim hle. R. Lalhmangaihzauli leh Lalbiakhlui Pachau te pawhin hnam zai hmangin kalkhawmte nung takin an awi bawk.

House band-te an cheṭha a, Mizorama musician ṭha ber ber te an ni bawk a music engkim a fuh vel vek a ni ber mai a, in lama lo thlirtute pawhin TV lamah pawh sound a felfai thu an sawi.

Ni khatnaa inlan Cindy Lalthanpui leh zaithiam dangte an che ṭha viau bawk a, H. Vanlalhlana chu mipui tihlimtu ber pakhat a la ni. Zaipawl, mimal leh band perform-te an che ṭha viau hlawm a, kut tihlawhtlingtu leh mit leh beng titlaitu ber pakhat an ni.