'All I Have To Do Is Dream' satu Don Everly a thi

Country rock lama sulsutu Don Everly, Everly Brothers zinga pakhat zawk chu kum 84 mi niin Inrinni khan a thi a, a thih chhan hi puanzar a la ni lo.

An chhungkaw aiawha thupuangtu chuan Nashville-a a chenna inah Don Everly hi a thi tih a puang a ni.

Don Everly leh a unaupa kum 2014-a boral tawh Phil Everly, Everly Brothers tia an duo hming inphuahte chuan kum 1957 khan 'Bye Bye Love' hmangin khawvel hriat an rawn hlawh chho ṭan a, 1960's chho vel thleng khan khawvel puma zaithiam hriat hlawh ber zinga mi an ni ṭhin.

Kum 1973 khan Everly Brothers chu tihtawp a ni thu an puangzar a ni. A lar vanglai tak tak, 1957-62 inkarah khan US top hit hla 15 zet an nei hman a, chung zingah chuan tun thlenga mi tam takin mawi an la tih em em 'All I Have To Do Is Dream' leh 'Cathy's Clown' te pawh kha a tel a ni.

Khawvela vocal duo pawimawh ber Everly Brothers
Rolling Stone magazine chuan Everly Brothers-te hi "Khawvela vocal duo pawimawh ber" tiin an sawi hial.

Kum 1986 khan Rock 'n' Roll Hall of Fame-ah lakluh an ni a, kum 1997-ah khan Grammy chuan 'lifetime achievement award' an lo hlan tawh bawk. Kum 1973-a an zai dun tawh dawn loh thu an puan aṭanga kum 10 hnu velah khan London-a concert-ah an zai dun leh a, a hnu lawkah comeback album-te pawh an tichhuak leh nghe nghe.

Khawvela band ropui ber nia mi tam takin an ngaih 'The Beatles'-te pawh influence tu niin Everly Brothers hi an sawi ṭhin a, Simon & Garfunkel-te pawh kha an influnce bawk a ni. Anni mai bakah hian Beach Boys, the Byrds, Bee Gees leh Eagles-te pawhin an rimawi hi an ngaina a ni.

Rolling Stones chuan “20 Greatest Duos of All Time” a thlanah a hmasa berah Everly Brothers hi an dah a, chutiang khawpa rimawi khawvelin a ngaih hlût chu an ni.

Studio album, 21 tehmeuh mai an tichhuak hman a, live album pahnih, compilation album 29 leh single 75 lai an tichhuak.

Associated Press news agency-in kum 1986-a an kawm ṭumin Don Everly chuan heti hian a sawi:-

"Kan duh zawng kan tih bakah ṭha nia kan hriat kha kan zawm mai. Rock 'n' roll a ral lo a, chumi chungchangah chuan kan dik a ni. Country pawh a ral lo a, chutah pawh chuan kan dik leh tho. A pahnihin a kaihkawp thei lo ang tiin miin sawi mah se, a kaihkawp theih a ni," tiin.