India series lian pahnihah Nunui Rualhleng

Mizo model tawnhriat ngah, Miss India Mizoram 2019 Lalnunthar (Nunui Rualhleng) chu Indian Web series lian pahnihah role pawimawh tak neiin a chang mek.

Nunui Rualhleng hi Special Ops 1.5 leh Masaba Masaba 2 ah kan hmu dawn a ni.

Special Ops 1.5 chu..
Special Ops hi thriller web series niin Disney Hotstar-ah stream theih a ni a, season khatna hi a hit hle a, IMDB ratings-ah pawh 8.6 lai a ni.

Director Neeraj Pandey hi tunlai Bollywood director -ah chuan langsar pawl niin MS Dhoni, A Wednesday, Special 26, Baby-te lo buatsaih tawhtu kha a ni.

Special Ops 1.5 hi shoot mek a ni a, Nunui role pawh shoot zawh tawh a ni. Nunui hian he web series-ah hian supporting role pawimawh tak a chang dawn a, kumin kum tawp lamah he series hi a en theih hmel.

Masaba Masaba 2 ve thung
Masaba Masaba web series hi a season hmasa chu Netflix ah en theih a ni a, hei pawh hian IMDB rating 6.7 a nei.

Fashion drama lam web series niin, season 2-ah hian Nunui hian fashion model role a chang dawn a, August 29 hian shooting an nei ṭan ang.

Nunui hi Mizo zinga hetiang web series lian thama role pawimawh neih hmasa ber a ni.

Nunui thukhawchang
Nunui chuan, "Hetiang dinhmun ka thleng thei hi ka lawm hle a. Ka nu leh pa leh ka chhungte min thlawpna zawng zawngah te, min duhsaka min fuiha min ṭawngṭaisak ṭhin tute an awm nual bawk a, an chungah thinlung takin lawmthu ka sawi.

"Pathian kaihhruaina leh malsawmna ka channaah hian ka lawm em em a ni. Hei hi a bul ṭanna ni turin theih tawp ka chhuah zel dawn a, he series pahnih hi a chhuah hunah min hlûtsaka min ensak ṭheuh turin ka sawm a che u," tiin Zoram mipuite min sawm a ni.