Mystical Mizoram Ṭhazual Gospel : The Prophets 'Siamtu Pathian' a ropui ber e

Mystical Mizoram Ṭhazual Gospel chart-ah Mizo gospel rock band ṭha ber zinga mi The Prophets hla 'Siamtu Pathian' chu pakhatna a ni.

'Siamtu Pathian' a ropui ber e
"Evolution theory pawmtu tam tak chuan kan chenna hi Pathian siam a nih loh zia an tlangau pui nasa hle a! Mahse keini Kristian, Pathian nung betu chuan engkim mai hi Pathian siam a nih zia Bible-in min hrilh hi kan pawm thung! Pathian ropui zia leh engkim siamtu a nih zia kan tarlanna hla a ni a! He hla aṭang hian a thara Pathian ropui zia i lo hriat leh theihnan uluk taka min ngaihthlak sak turin kan sawm a che u," tia an music video-a caption an siam 'Siamtu Pathian' chu The Prophets chuan chart-ah topper an rawn nihpui ta.

The Prophets 'Siamtu Pathian' hla hi a mawi a, June thla tir lama an tihchhuah kha niin, music video hmuhnawm tak leh awmze nei tak nen an tichhhuak a ni.

Rimawi lam, a bikin rock music tuipuitute tan phei chuan he hla hi ngaihthlak a manhla hle ang tih a chiang a, rock competition hrang hranga lawmman vawi duai lo lo dawng tawhtu The Prophets-in chart-a ro an rel hi a mak lo viau mai.

One in Christ pahnihna an ni
Chart-a pahnihna chu One in Christ hla 'Ka mit ngei hian a thlir ang' tih kha a ni. He hla hi chart hmasa lamah khan pathumna a ni a, tunah erawh pahnihnaah a rawn inhlangkai ta a, chart tihchhuah leh huna a dinhmun tur hriat a chakawm tawh viau mai.

Angaihteii, Maruati leh Cindy
'Min hmangaih loh i thei lo' tih hla thiam taka satu Angaihteii chuan a hla 'Sakeibaknei leh beramno' chu top 3-ah a rawn inhlangkai ta.

Palina chu Maruati 'Pathian hmangaihna' kha a ni a, Cindy Lalthanpuii hla 'Siamtu zai ngai' chu top 5 khartu a ni.

Chart-ah Maruati hla pahnih a lang a, 'Pathian hmangaihna' bakah hian a music video thar ber 'Vanah lawmman' chu 10-na ani bawk.

Hruaia & Samuela 'Aw Lal ropui ber' chu parukna a ni a, Zorinsanga Sailo, Melody Lalzirliani leh Lianzela-te pawh chart top 10-ah hian an lang a ni.