Miss Chapchar Kut thlanna nei

Mizoram hmun hrang hrangah March 1 & 2 khan Chapchar Kut hlim taka hman a ni a, Aizawl leh district ṭhenkhatah Miss Chapchar Kut thlanna neih a ni. Kut lawmna pui ber chu Lammualah neih niin, Diktawn Magazine leh Mizo Photographer's Society-te'n kut chhim tura kal khawmte aṭangin Miss leh Lady thlanna an nei a, result puan a la ni lo.

District ṭhenkhatah pawh Miss Chapchar Kut thlanna hi neih a ni a, Lawngtlaiah chuan Lawngtlai Photographers Association-te'n Miss Chapchar Kut hi an thlang a ni. Lawngtlai Electric Veng nula, Mimi K. Lalenmawii (21) chu Miss Chapchar kut 2018 atan thlan a ni. Lungleiah pawh Miss thlanna hi neih a ni a, R. Lalrinhlui chu Kut Miss atan thlan a ni.

Champhaiah pawh Miss thlanna hi Chapchar Kut Organising Committee bultumin neih a ni a, Kahrawt Veng nula Lalnunchawii Sailo chu Kut Miss atan hian thlan a ni. Serchhipah pawh kut hi hlim tak lawm a ni a, kal khawmte aṭangin Kut Miss thlan niin, Dinthar nula Malsawmsangi chu Miss Chapchar Kut a ni.

Kolasib-ah chuan Tumpui Field-ah Chapchar Kut hi lawm a ni a, Banglakawn, Hmarvenga cheng Lalṭhazuali chu 'Kut Nula' atan thlan a ni.