90th Academy Award Shape of Water-in Oscar la hnem ber

Kum tina sem ṭhin film lama chawimawina sang Academy Award chu Pathianni zan khan sem a ni leh ta a, award 24 zet sem chhuah a ni. Oscar Award tia sawi bawk Academy Award hi Dolby Theatre, Los Angeles, California-ah neih a ni a, tun hi a ṭum 90-na a ni. Tun ṭumah hian nikum December thlaa tlangzarh fantasy film 'The Shape of Water' chu a langsar leh ber a, award pali zet a dawng.

Academy award sem hi American television host Jimmy Kimmel chuan a kaihhruai a, film star lar tel an ṭhahnem hle. Award dawng thei turte hi January thla khan puan a lo ni tawh a, rin lawk ang ngeiin The Shape of Water changtute an langsar hle. The Shape of Water hian award ngaihhlut hlawh Best Picture award a dawng a, hei bakah hian Best Original Score leh Best Production Design award-te a la. Hei bakah hian film director Guillermo del Toro chuan Best Director award a dawng bawk.

Thriller film Dunkirk chuan award pathum - Best Film Editing, Best Sound Mixing leh Best Sound Editing a dawng a, a langsar viau bawk. Dunkirk hi nikum July thla khan tlangzarh a ni a, English film director lar Christopher Nolan kut chhuak a ni. Box Office-ah pawh a hit hle a, sum pawh a hailut hnem hle. Dunkirk hi catogory pariat zetah award dawng thei tura chawpchhuah a ni nghe nghe. Nikuma film chhuak zinga lar leh sum lalut hnem ber pawl Darkest Hour leh Blade Runner 2049-te chuan chuan award pahnih an dawng bawk a, animation film Coco pawhin Best Original Song leh Best Animated Feature award a dawng bawk.

Mimal langsar
Darkest Hour star Gary Oldman leh Three Billboards Outside Ebbing, Missouri star Frances McDormand-te chuan mimala langsar an ni a, award ngaihhlut hlawh an hum haw. English actor Oldman hi Best Actor atan thlan a ni a, American actress McDormand hnenah Best Actress award hlan a ni. Kumin January thlaa sem 60th Annual Grammy Award-a che

ṭha tak Three Billboards Outside Ebbing, Missouri changtute an che ṭha a, McDormand bakah hian, American actor Sam Rockwell chuan Best Supporting Actor award a dawng. Drama/Sport film 'I, Tonya' star Allison Janney chu Best Supporting Actress a ni thung.

A ṭobul
Film lama chawimawina sang Academy Award hi May 16, 1929 khan a vawi khat nan sem chhuah a ni a, tun thlengin sem zui a ni ta a ni. Academy of Motion Picture Arts and Sciences (AMPAS) chuan kumtin an sem ṭhin a, tunah chuan film khawvela chawimawinsa sang ber ang hila ngaih a ni tawh. Category 24-ah ṭhen niin, film khawvela mi hlawhlting bikte hnenah 'Academy Award of Merit' tih vauhin pek chhuah ṭhin a ni.

Hun a kal zela tunah chuan 'Oscar' tiin hriat lar a lo ni ta a ni. Award hi Canadian designer George Stanley design a ni a, kum 88 daih liam ta khan Hollywood Roosevelt Hotel, Los Angeles-ah an lo semchhuak tawh a ni. Film lamah chuan chawimawina sang berah ngaih a ni a, chu chu khawvel pawhin a pawm dan a ni.