Oscar-ah Sridevi leh Shashi sunna hun hmang

Film khawvela chawi­mawina sang leh ngaihhlut Academy Award chu Pathianni zan khan Dolby Theatre, Los Angeles, California-ah sem a ni a, he hunah hian Indian film star fam ta Sridevi leh Shashi Kapoor te pualin hun hman a ni.

Bollywood legend Sridevi Kapoor hi thla liam ta mai khan Dubai-ah lungphuchawlin a thi thut a, film khawvel a barakhaih hle. Shashi Kapoor pawh hi nikum December thla khan kum 79 mi niin Mumbai-ah a boral a, uitu a ngah hle a ni. Sridevi leh Shashi Kapoor te hi Bollywood leh Hollywood star ten an sun a, Oscar sem ṭumah pawh hian zahna hlan an ni. Academy Awards ceremony-ah hian James Bond star hlui Roger Moore pawh a sunna hun hman a ni bawk.