Miss Mizoram 2018 hriat zan

Miss Mizo­ram thlanna chu zanin hian a hmawr bawk a ni dawn ta a, R.Dengthuama Hall-ah Grand Finale neih a ni ang.

Mipuiten tunge Miss Mizoram ni ang tia kan inrinsiak laiin, zaninah engkim a chiang dawn.

Dar 7 aṭangin live programme a awm dawn a, Red Carpet chu Zonet Bawhbelah live-a pekchhuah a ni dawn. Show tak tak hi zan dar 8:00 aṭangin Zonet Zawlbuk leh Zonet HD-ahte live a ni dawn a, Zonet Youtube channe-ah live-a pekchhuah a ni dawn bawk. Mizoram pawna awmte tan pawh show hi mahni khum laizawl aṭangin en theihin a awm dawn tihna a ni.

Miss Mizoram 2018 thlanna hi January thla aṭang khan ṭan niin, mi 12 ten intihsiak an hmachhawn a, contestant an ṭhat tlan avangin miss tur ber pawh rin thiam a har rih viau.

Hmelṭhat leh pian nalh ringawt a tawk lo va, personality ṭha te, mahni inringtawk leh midangte aia ṭhat bikna nei nihte a ngai. Intihsiakna hrang hranga chet ṭhatin kawngro a su viau dawn a, zanina an inlan leh tura chet ṭhatin thil thui tak a la hril thei bawk.

Miss atana thlan hian lawm­manah pawisa fai Rs. 1,10,000 a dawng dawn a, hamṭhatna dang pawh a dawng tel nual dawn - a dawn tur zingah Vespa scooter leh Vivo Phone pawh a tel a, Dubai Trip a la keng tel cheu bawk.

1st Runner Up hian Rs. 50,000 leh Vivo phone a dawng dawn a, 2nd Runner Up hnenah Rs. 30,000 leh Vivo phone hlan a ni bawk ang. Sub-title latuten Rs.15,000 ṭheuh an dawng dawn a, a tel zawng zawngten Rs. 10,000 an dawng ṭheuh bawk ang.