Box Office : Black Panther vul lai a rei

Marvel movie chhuak thar ber 'Black Panther' chu a hit zui zel a, North American Box office-ah a zawnin kar thum chhung sum lalut hnem ber a ni ta. Kar liam ta chhung khan US-ah ringawt $mtd 65.7 zet a lalut leh a ni.

Science fiction film Black Panther thar hi January 29 khan tlangzarh a ni a, Box Office-ah roreltu a ni nghal chat. Tun thlengin sum lakluh tam lamah khum thei an la awm lo a, Box office-a a a sum lakluh tawh zawng zawng chu $mtd 748.2 zet a tling tawh. Black Panther hian tlangzarh aṭanga kar thumnaah pawh $mtd 65.7 zet a la lalut thei a, Avatar ($mtd 69) leh Star Wars: The Force Awakens ($mtd 90) te chiah tluk loh a nei.

March 1-a tlangzarh Red Sparrow chu sum lalut tam pahnihna a ni a, $mtd 17 a lalut. American actress Jennifer Lawrence channa thriller film chhuak thar hi sum lakluh tam lamah che ṭha nghal lo mah se box Office-ah hmuh tur a awm zui zel a rinawm. Tun hnaia tlangzarh Death Wish leh Game Night te pawh sum lalut tam zingah an tel a, an sum lakluh hi $mtd 13 leh $mtd 10.7 a ni. Peter Rabbit pawh top 5-ah a lang pha cheu bawk.

Top 10-ah hian hun rei tak chhung sum lalut hnem lo ni tawh Jumanji: Welcome to the Jungle pawh a lang leh a, a sum lakluh twh zawng zawng chu $mtd 919.9 zet a ni. Fifty Shades Freed leh The Greatest Showman te chu sum lalut tam zingah an la tel ve bawk.