Box Office : Free Guy bawk pakhatna

Kar liam ta chhung khan film tlangzarh thar eng emaw zat awm mah se 'Free Guy' bawk pakhatna a ni leh a, a sum lakluh pawh a la tam fal ang reng hle.

'Free Guy' a la zalen zel
Kar tawp liam ta chhung khan Ryan Reynolds channa 'Free Guy' hi theatre 4,165 laiah pek chhuah leh niin $18,790,000 lai sum a lalut leh.

Free Guy hi $mtd 100–125 vel senga an siam niin, an budget hi an khum ṭep tawh. US pawn lamah $53,100,000 lai sum a lalut tawha, North America Box Office aṭangin $58,812,975 lai lalut tawh bawkin a sum lakluh belhkhawm chu nimin thleng khan $111,912,975 a tling tawh.

Ryan Reynolds, Jodie Comer leh Taika Waititi-te channa film hi film review-tu lamin an fak a, Rotten Tomatoes-ah phei chuan mi 224-in an review aṭangin rating 7.10/10 lai a hmu.

He film hi Disney lam chuan a chhunzawmna an duh niin Reynolds chuan a lo sawi tawh bawk a, a chhunzawmna pawh kan hmu leh thuai mai thei a ni.

Pahnihna 'PAW Patrol: The Movie'
Computer-animated action-adventure comedy film 'PAW Patrol: The Movie' chu Zirtawpni liam taah khan US-ah tlangzarh a ni a, theatre 3,183-ah pe chhuakin $13,148,340 a lalut a, chart-ah pahnihna a ni.

'Jungle Cruise' chu pathumna bawk a ni leh a, kar hmasaa pahnihna 'Don't Breathe 2' chu palina a ni ve thung.

Film tharte chu...
Box Office Mojo chart-ah chuan film 46 lai sum lakluh zat tarlan a ni a, film thar eng emaw zat a awm. Top 10-ah ringawt pawh film tlangzarh thar pali lai an lang a ni.

The Protege (7), The Night House (8) leh Reminiscence (9)-te chu top 10-a film thar lang an ni a, heng film-te bakah hian Flag Day (24), Demonic (25), Cryptozoo (30), leh On Broadway (37)-te chu film thar an ni bawk.