Pokémon game thar ho tlangzarh hun tur a hriat ta

Pokémon chuan game eng emaw zat an tlangzarh thar dawn a, chung game hrang hrang tlangzarh hun tur chu kar hmasa lamah khan an puangzar a ni.

Nitendo Switch lama an khelh huai huai tawh, Multiplayer Online Battle Arena game Pokémon Unite chu September 22 hian Apple App store leh Android Play Store-ah tlangzarh an tum.

MOBA game dang ang bawkin he game hi khelh tur a ni dawn a, hero-ah Pokémon character hrang hrang a hman theih thung ang.

Pokémon Brilliant Diamond leh Pokémon Shining Pearl-te chu Nintendo Switch-a khelh theih turin November 19 hian an chhawp chhuak tawh dawn bawk. He game kalphung tur hi an chhawp chhuak tawh bawk a, Pokémon Diamond leh Pearl upgrade version a ni ber ang chu.

Khawvel ram hrang hranga gamer-te leh Pokémon fan-te nghahhleh Pokémon Legends: Arceus tlangzarh hun tur pawh a hriat ta a, nakkum January 28-ah an tlangzarh dawn a ni. Pokémon Legends: Arceus hi Game Freak siam a ni a, open world game a ni dawn nia sawi a ni a, hmasang hun Sinnoh region, Hisui region a thil thleng angin a game an duang a ni.