'Spider-Man : No Way Home' trailer hmuh tur a awm ta

Sony leh Marvel Studio chuan niminah khan fan-te'n an ngahhleh em em 'Spider-Man No Way Home' trailer chu an tichhuak ta.

'Spider-Man No Way Home' trailer hi nimin piah lamah khan internet lamah a leak niin thuthang a awm a, Sony chuan theihtawp a chhuah nghal. Nimin lamah erawh trailer an rawm chhawp chhuak ta a, a hmuhnawm hmelin en a chakawm tawh viau mai.

Spiderman film hmasa tawp lamah khan Mysterio khan Spiderman-a nihna khawvel hriatah a puangzar a nih kha. Trailer aṭanga a lan dan chuan khami avang khan Peter Parker chu a buai zui hle a, Doctor Strange hnenah kalin miin a nihna an theihnghilh lehna tura pui turin a ngen a, chumi avang chu a ni mai thei, multiverse khawvel kha a lo thlen phah ta a ni.

Trailer-ah chuan a hmaa puanzara lo awm lawk tawh angin Alfred Molina 'Dr Octopus' hmuh tur a awm a, Green Goblin pumpkin bomb hmuh tur a awm bakah Electro hnuhma niawm tak hmuh tur a awm bawk.

'Spider-Man No Way Home' hi December 17-a tlangzarh tura ruahman niin MCU phase 4 movie zinga mi tur a ni. Willem Dafoe, Alfred Molina leh Jamie Foxx-te chu an inlan dawn tih a chiang tawh a, Spider-Man film hlui hoa an role bawk an chang leh dawn a ni.