A record siam sa khûmtu Lauren Daigle

Billboard Top Christian Albums chart-ah Lauren Daigle album 'Look Up Child' chu kar 100 tehmeuh mai No.1 a ni ta. Lauren Daigle hian a record siam sa chu amah vekin a khum a ni.

Lauren Diagle hian he album hi kar 154 vel zet Top Christian Albums chart-ah hian a lanpui tawh a, chung zinga kar 100 chu topper dinhmunah a ding a, Billboard chart history, kum 41 chhungin hetiang dinhmun thleng thei hi an la awm lo.

'Look Up Child' album hian kar liam ta khan equivalent album unit 5,000 hmu chhuak lehin Christian Album chart-ah hian ro a rawn rel nawn leh a ni.

He album hi September 2018 khan a vawi khatna atan Billboard Top Christian Albums chart-ah pakhatna a rawn ni a, chumi ṭum chuan Billboard 200 chart-ah pathumna a ni bawk.

Vawiin thlengin he album hian EAU maktaduai 1.9 chuang a hmu chhuak tawh a, album nuai 8 vel zet US-ah a hralh tawh bawk.

Rimawi hian hunbi a lo nei thei lo tak tak" Daigle
Record a siam vanga Billboard-in an kawmnaah 'You Say' hitmaker chuan, "Rimawi danglam bikna em em chu, hunbi a lo nei thei lo tak tak a ni," tiin a sawi.

Album thar a buaipui mek tih sawi bawkin, nakkum lamah chuan album thar tihchhuah hman a tum tih a sawi bawk a ni.

'Look Up Child' chu a beisei phak bakah a hlawhtlin thu leh miin hun harsa tak an tawh laia a album-a hlate inhnemna atana an hmang chu ṭha a tih lai ber a nih thu a sawi bawk a ni.

Billboard 200 chart-ah Billie Eilish bawk
Billie Eilish album thar ber 'Happier Than Ever' chu a zawnin kar thum chhung Billboard 200 album chart-ah pakhatna a ni ta. Eilish hian September thlaah hian a album tihlar lehzualna tur ni pahfawmin Disney+ documentary concert film, 'Happier Than Ever: A Love Letter to Los Angeles' chu tihchhuah a tum leh bawk a ni.

Kar hmasa lama pangana Doja Cat album 'Planet Her' chu pahnihna a ni thung a, Olivia Rodrigo album 'Sour' pawh kar eng emaw zat chhung pahnihna a nih hnuah pathumnaah a thla thla ve thung.

Hot 100 leh Artist 100
Billboard Hot 100 chart-ah chuan The Kid LAROI & Justin Bieber 'Stay' bawk pakhatna a ni leh a, Ed Sheeran 'Bad Habits' chu pahnihna niin Olivia Rodrigo 'Good 4 U' chu pathumna a ni ve bawk.

Artist 100 chart-ah chuan kar hmasa lama pahnihna BTS chu pakhatna an ni a, Olivia Rodrigo chu pahnihna niin Billie Eilish chu pathumna a ni.