The Rolling Stones tana lungpui pawimawh Charlie Watts a fam ta

Khawvela band ropui ber zinga mi The Rolling Stones drummer Charlie Watts chu Thawhlehni khan kum 80 mi niin a thi.

"Kan hmangaih tak Charlie Watts chu a boral ta tih lungngai tak chungin ka rawn puangzar a ni.

"London-a damdawi-inah thlamuang takin a chhungte a bula an awm laiin a kal a ni. Charlie kha pasal, pa leh pu hlu tak a ni a, The Rolling Stones member niin an hunlai chuan drummer ṭha ber zinga mi a ni. He hun harsa takah hian a chhung te, a band member te leh a ṭhian hnaite chu hun thawl pe turin kan ngen che u a ni," tiin Watts-a thupuangtu chuan thuchhuah a siam.

The Rolling Stones kan hria. An hla hre lo pawhin an band hming tal chu an hre vek ang. Rolling Stones magazine-in 'Greatest Artists of All Time' list-a palinaa a dah, US-a an hlawhtlin dan behchhana list siamtu Billboard-in 'Greatest Artists of All Time' list an tihchhuaha pahnihnaa an dah ni bawk; Grammy Awards pathum lai dawng tawh leh Grammy Lifetime Achievement Award hial pawh lo dawng tawhtu band-a an khuangpu ropuina hi sawifiah a har hial zawk awm e.

June 2, 1971 khan London-ah piangin, January 1963 aṭang khan The Rolling Stones-ah telin a thihni thlengin he band hi a chhuahsan lo.

Tunhnai lawk khan The Rolling Stones chuan No Filter tour an neih turah Charlie hi a tel thei dawn lo tih an puang a, chumi an puan aṭanga rei vak loah a thih thu hi puanzar a ni ta a, a thih chhan tak erawh tarlan a la ni lo.

He thuziak chhiartu tam tak pian hma, kum 1979-ah daih tawh khan an guitarist Keith Richards chuan, "Mi zawng zawngin Mick leh Keith hi The Rolling Stones-ah an ngai. Charlie hian drummer a nih anga a tih tur hi ti lo se chu, mi thusawi hi a dik lo ang. Charlie Watts hi 'Lungpui' diktak chu a ni tih in hrechhuak mai ang," tiin a lo sawi tawh a, chutiang khawp chuan an vanglai tak tak pawh khan a bandmate-te pawhin an lo ngaihlu ṭhin a ni.

Crosby member Graham Nash chuan,"Sawi buai a ngai lo, Charlie Watts kha khawvela drummer ropui ber zinga mi a ni. A thuruk - Ringo ang chiahin- chu lungphu a ni. Charlie Watts kha Rolling Stones lungphu a ni," tiin Rolling Stones magazine a hrilh hial.

Milar hrang hrangin Watts an uina thu an tarlang nasa hle a, chung zingah chuan Paul McCartney, Ringo Starr, John Mayer, Elton John leh John Lennon-te pawh an tel.

Khuangpu ropui chu
Charlie Watts kha Jazz fan a ni a, kum 14 vel lek a nih aṭangin drums a vaw ṭan a, Stones drummer hmasa ber erawh a ni lo.

January 12, 1963 aṭangin Stones tan khuang a vaw ṭan a, a ho hian Rolling Stones chuan rimawi khawvel an rûn a ni ber a, ṭhangthar thlengin an band hming hre lo pawh an awm mang ta lo a ni. Kum 2006 khan 'Modern Drummer Hall of Fame'-ah lakluh a lo ni tawh a, chumi kumah vek chuan Vanity Fair chuan 'International Best Dressed List Hall of Fame'-ah an lalut ve bawk.

Kum 2016-ah khan Rolling Stone's magazine chuan '100 Greatest Drummers of All Time' an tihchhuahah 12-naah an dah hial. Watts hian a nupui Shirley, a fanu Serafina leh a tunu Charlotte-te a kalsan a ni.