Cindy Lalthanpuii hla thar zanin Zonet-ah

'A mawi ber' medley mawi taka satu Cindy Lalthanpuii chuan hla thar pahnih a nei a, pakhat chu Zonet lamah tihchhuak tawhin zanin hian a hla pakhat zawk chu a tichhuak ve thung dawn.

Ka Pa
Zanin hian Zonet-ah a hla thar pakhat zawk 'Ka Pa' tih chu a tihchhuak dawn a, Cindy zai ngainatute tan chuan a ngaihven chi viau ang. He hla hi YouTube lamah pawh a dah chhuak thuai dawn a ni.

'Ka Pa' hi Zoremi Hmar phuah a ni a, Lallungawia Hrangchal hriatrenga atana a phuah a ni. Lallungawia hi chhungkua hlim tak leh inthlahlel taka an awm laiin October 27, 2019 khan a boral a, amah ngai em emtu a nupui fanaute tan Zoremi hian a phuah a ni.

"Chhungkaw tamtak pa ber thihna avanga khawhar em em leh hmun ruak lian tak nei ta mi tamtak in awm ve tih kan hria a, he hla hi in tan pawh kan rawn hlan e," tiin hla phuahtu chuan a sawi.

I awm vangin
'I awm vangin' hi chu mi ṭhenkhat chuan Zonet lamah kan thlirin kan ngaithla tawhin a rinawm.

He hla hi Fela, Durtlang Leitan hla phuah dahkhawmna album 'Pathian Hmangaihna'-a mi tho kha a ni a, Cindy YouTube channel lamah duh hun huna hmeh chhuah theihin a awm thuai dawn.

Mal ngawih ngawih a inngai, nun khawhar taka hmangte tan pawh Pathian hi kan tan a lo awm reng a ni tih puanchhuahna hla ṭha tak hi ngaihthlak a manhla viau mai.

Mizo Gospel singer lar ber zinga mi hi a hla tihchhuahte a hit ṭhin hle a, tunah pawh hian Ṭhazual chart lamah V Thangzama hla thiam taka a sak 'Siamtu zai ngai mai rawh' tih chu pangana a ni mek a ni.