Rebecca Lallawmsangi - 'Zinkawng' a ngaihthlak theih ṭep

'Kan khua' tih hla hmanga Zofate min awitu Rebecca Lallawmsangi chuan hla thar 'Zinkawng' a tichhuak dawn a, tunkar chhung hi chuan a YouTube channel lamah dah hman a inbeisei.

He hla hi 'Kan khua' phuahtu Peka Fanai phuah bawk niin music pawh amahin a produce a ni a, Audio Recording chu The Pee Bee Records niin video chu Daama Chawngthu kut chhuak a ni dawn thung. Production team-te hi 'Kan khua' project-a a thawhpuite tho kha an ni a, chuvang chuan a 'hit' leh ngei beisei ang.

Rebecca-i chuan a hla tihchhuah thar tur chu a hla thupui angin 'zinkawng' hla a nih thu a sawi a, khawkar kawnga zin mite hun hman dan ṭhin tlangpui tarlanna leh mahni In chhung nuam tak mai thlakhlelhna hla a ni, a ti.

"A hla thuah hian Mizote min tihmingṭha em emtu leh zin mite hip em em ṭhintu Nghahloh dawrte pawh a rawn lang a ni. Hetiang lam hla hi mizote hian kan la nei vak lem lo a, zin nuam ti mi tan chuan hla ngainat awm tak a nih ngei kan beisei. Rhyming Scheme uluk tak nena he hla hi ziah niin, hla thu danglam tak tak hman a ni bawk.," tiin a sawi bawk.

He hla hi Spotify leh streaming platform hrang hrangah dah a tum bawk a ni.

Rebecca-i hi a hla tihchhuah apiang a 'hit' emaw tihmai tur a ni a, nikum kum tawp dawna a tihchhuah 'Kan khua' phei kha chuan YouTube lamah thlirtu makatduai 8.2 chuang tehmeuh a nei tawh a, Mizo hla ngei hmanga music video siamah chuan thlir hlawh ber a ni hial awm e. Kumin Krismas dawnah nasa takin thlirtu zat an pung lehin a a rinawm a, he hla hian Mizo YouTube record khum har tawh tak tur a la siam ngei dawn niin a lang.