Halsey album thar a ngaihthlak theih ta

'Without Me' hitmaker Halsey chuan nimin khan a studio album palina 'If I Can't Have Love, I Want Power' chu Capitol Records kaltlangin a tlangzarh.

Hmanni lawka naute thar nei Halsey hian a album thar hi rai lai leh fa neih laia hlimna leh hlauhna awm ṭhin chungchang a nih thu July thla tir lamah khan a lo sawi tawh a ni.

'If I Can't Have Love, I Want Power' album-ah hian hla 13 a awm a, alternative leh grunge-pop lam hawi a ni a, Halsey zai ngainatute tan chuan he album hi ngaihthlak a manhla leh viau ang.

Kum 2015 khan Halsey hian a album hmasa ber 'Badlands' a tichhuak a, Billboard 200 chart-ah pahnihna a hauh nghal a, hralh pawh a hralh hnem nghal hle.

Tuna a album tihchhuah thar hi critics lam chuan an fak tlangpui a, The Independent critic Helen Brown chuan Halsey chu a album tharah hian P!nk leh Grimes-te nen khaikhinin a 'If I Can't Have Love, I Want Power' album chu album ropui tak a nih thu a sawi.

Halsey hian Nilaini khan a album nena inzawm film- 'If I Can't Have Love, I Want Power' tih tho chu a tlangzarh a, US hmun hrang hrangah chuan he film hi an tichhuak tawh a ni.

American film siamtu, a music video 'Without Me' leh 'You Should Be Sad'-te direct saktu bawk khan he film hi a direct a, R rated film a ni a, July 13 khan a trailer pawh a lo tihchhuak tawh a ni.

Tuna a album thar cover hian sawizui a hlawh angreng hle a, July thla tir lama a pholan aṭang khan media hrang hrang ngaiven a hlawh angreng viau mai. French lemziah thiam Jean Fouquet-in kum 1452 vela a lemziah 'Melun Diptych' nena inang deuha an siam a ni.

'If I Can't Have Love, I Want Power'-a hla awmte:-
1. "The Tradition"
2. "Bells in Santa Fe"
3. "Easier than Lying"ṭ
4. "Lilith"
5. "Girl Is a Gun"
6. "You Asked for This"
7. "Darling"
8. "1121"
9. "Honey"
10. "Whispers"
11. "I Am Not a Woman, I'm a God"
12. "The Lighthouse"
13. "Ya'aburnee"