Haiti lirnghing tuarte tan Ryan Reynolds te nupa, Metallica

Haiti lirnghing tuarte ṭanpuina atan ṭanpui ngaite ṭanpuina kawnga vawi eng emaw zat ke lo pen chhuak tawh, heavy metal legend Metallica leh Ryan Reynolds-te nupa chuan sum eng emaw zat an theh chhuak leh ta.

Ryan Reynolds leh Blake Lively
August 14-a lirnging na tak tuartu Haiti ram tan Blake Lively leh Ryan Reynolds-te chuan Hope for Haiti hnenah $10,000 an pe.

Thawhlehni khan Hope for Haiti chuan an social media account kaltlangin hemi chungchang hi an tarlang a, celebrity nupa chu an thilphalna avangin lawmthu an hrilh.

Hope for Haiti lam hian Reynolds-te nupa sum thawh zat chiah hi a tirah chuan an tarlang loa, mahse TMZ lam chuan a hnu deuhah an tarlang a ni.

Deadpool actor leh Gossip Girl actress-te hian midang ṭanpuina turin vawi duai lo sum tam tham tak tak an lo thawh tawh ṭhin a, kum liam taah ringawt pawh khan hrileng tuarte bakah chi inthliarna dodalna atan bakah pawl hrang hrangah pawisa an pe fo a ni.

Metallica
Heavy metal legend Metallica chuan Nilaini khan All Within My Hands Foundation kaltlangin Haiti lirnghing tuarte ṭanpuina atan $50,000 an pek thu an tarlang.

All Within My Hands Foundation chuan ṭanpuina an pek chungchang an tarlanaah hian Haiti lirnghing vanga mi 2,207 an thih thu te, mi 12k an hliam thute leh mi sing nga vel zetin chenna in an hloh thute pawh an tarlang a ni.

Cardi B, Don Omar leh Steven Van Zandt te pawhin Haiti lirnghing tuarte an hriatreng thu leh an tawrhpui thute pawh social media kaltlangin an lo tarlang tawh bawk.