Mimi Remruatsangi 'Vul zel rawh aw' a vul ber

Ṭhazual Lengzem chart-ah rorel­tu thar a awm a, MDM artist thar ber zinga mi Mimi Remruatsangi hla thar 'Vul zel rawh aw' chu No.1 a ni. Didika Chhakchhuak 'I lo bei reng si' chu pahnihna niin Rengchal 'Ngaihzuali' chu pathumna a ni bawk.

'Vul zel rawh aw' hi Mimi Rem­ruat­sangi'n MDM-a a hla register hmasa ber a ni a, January-a a tih­chhuah kha niin Lalramthara (Mama) phuah a ni.

  

Mimi music video pakuana a ni a, MDM member a nih hma hian music video pariat a tichhuak tawh bawk.

'Vul zel rawh aw' hi a video dang ang bawkin music video thlir nuam tak a ni a, a hla a nalh piah lamah Mimi hian a sa lungkuai thiam a, ngaihthlak manhla tak a ni. Mimii hian MDM library-a a hla register hmasa ber chu Ṭhazual chart-ah No.1 a nihpui nghal thei a, a tan pawh thil chhinchhiah tlak tak a ni ngei ang.

Chart-a No.2 Didika Chhak­chhuak 'I lo bei reng si' pawh hi January thlaa a tihchhuah tho kha niin Mimi nen hian an tihchhuah hun a inrual hle. He hla hi Rebecka Vaiphei phuah niin Didika hian a thluk a siam thung a, dinhmun ṭha bera ding thei turin a dinhmun a sawh nghet mek zel a ni.

Pathumna Rengchal 'Ngaihzuali' hi February thla tir lama tihchhuah kha niin anni pawh hian an dinhmun an rawn sawh nghet mek bawk.

Tommy L Pachuau chuan a hla thar 'Lungrunpui' hma a sawnpui zel a, palinaah a rawn inhlangkai tawh a ni. Mama Fishtail 'Kan damchhan' chuan Top 5 a khar thung.

Ṭhazual chart-ah hian hming langsar tak tak an rawn inlar ṭan leh nual bawk a, Mizo Idol star Marina Vanhriatpuii Varte chuan 'Awithangpa hla' parukna nihpuiin Michelle Varte pawhin a music video hmuhnawm tak 'Chawngtinleri' chu pariatna a rawn nihpui bawk a, hma sawn chho zel tura ngaih a ni.

1    Mimi Remruatsangi    - Vul zel rawh aw

2    Didika Chhakchhuak    - I lo bei reng si 

3    Rengchal    - Ngaihzuali

4    Tommy L Pachuau    - Lungrunpui

5    Mama Fishtail    - Kan damchhan

6    Marina Vanhriatpuii Varte    - Awithangpa hla

7    Eddie Pachuau    - Lairil hmangaihna

8    Michelle Varte    - Chawngtinleri

9    RD Thangi Ralte    - Ka thian Goodbye

10    Mapuii    - Zirtirtu ṭha