India-ah Samsung Galaxy S9 tlangzarh a ni ta

Samsung chuan an smart­phone chhuanvawr Galaxy S9 leh Galaxy S9+-te chu India-ah Thawhlehni khan a tlangzarh ta.

South Korean multinational company hian Galaxy S9 leh S9+-te hi March 16 khian an tlangzarh dawn a, ni 10 ala awm tihah mihring tamna India-ah an tlangzarh ta a ni. New Delhi-ah tlangzarh a ni a, mahse lei theihin a awm nghal dawn lo a, march 16 nghah a ngai dawn a ni. Hetih rual hian chah lawk theih a nih avangin buaina tur a awm chuang lo. Sam­sung smartphone thar hi tunlai phone chhuak thar zingah chuan ngaihven hlawh ber pawl a ni.

Samsung chuan Mobile World Congress 2018-ah khan S9 leh S9+ an tlangzarh tur thu hi an lo puang tawh a, tunah chuan Samsung smartpahone ngainatute tan lei theiha chawp­chhuahin a awm ta a ni.

Samsung hian India bikah hian Airtel leh Reliance Jio-te an thawhpui a, customer tan hamṭhatna a awm nual dawn. Reliance Jio chuan Galaxy S9, Galaxy S9+ consumer-te tan special annual tariff plan an nei dawn a, Vodafone hmagtute tan pawh hamṭhatna tur a awm dawn nia tarlan a ni bawk. Samsung India Senior VP, Mobile Business Asim Warsi chuan, "Bharti Airtel leh Reliance Jio-te kan thawhpui thei hi kan lawm a, Galaxy S9 leh S9+ hmangtute chu tun hmaa la awm ngai lo internet chak ṭha zawk kan chawpchhuak sak dawn a ni" a ti.

Bihchianna
A hmasa berah chuan Galaxy S9 leh S9+ smartphone hi AR Emoji feature a ni a, Apple Animoji nen a danglam hlek dawn. Emoji hi keyboard applica­tion hmangin application dangah a share theih dawn. Rimawi ngainatute tan dual speaker a nihna hi lei chhan tham a ni ang. Tunlai smartphone hmangtuten nuam an tih ber pakhat chu thlalak a ni. Hei hi company lam chuan hriain camera pawh an thuam ṭha viau a, Galaxy S9+ bik hi dual aperture a ni. Aperture hi 2.4 a ni a, eng ṭhat lohnaah chuan 1.5-ah a dah theih dawn bawk.

Galaxy S9 hi a RAM 4GB niin, a battery hi 3000mAh a ni thung. Camera pawh 12-megapixel niin, Super Speed Dual Pixel a ni. Dual-band Wi-Fi a ni bawk. A ṭhatna ber tur pakhat chu wireless charger a nihna hi a ni. Mihring kan buai tawh avangin, phone charge mumal hman lo tan pawh awlsam zawkin a charge theih dawn a ni.

A man lam hi
Samsum smartphone chhuak thar tur hi a man a tlawm vak dawn lo a, India bikah chuan 64GB model, Galaxy S9 hi Rs. 57,900 aṭangin a inṭan ang. 256GB variant hi Rs. 65,900 a ni dawn thung. Galaxy S9+ 64GB hi Rs. 64,900 a ni dawn a, 256GB variant chu Rs. 72,900 a ni ang. Hetih lai hian company lam chuan India-ah bik chuan 128GB variant an tlangzarh dawn lo tih an sawi.

A colour thlan tur a tam dawn lo a, rawng chi thum - Lilac Purple, Coral Blue leh Midnight Black-te a awm dawn. Pre-booking hi hawn mek a ni a, Flipkart-ah order theihin awm.