Ṭawngṭai tura tho hma ṭhin Dolly Parton

Country music superstar Dolly Parton chuan zingah hma takah Pathian hnena ṭawng­ṭai tura a thawh hma ṭhin thu a sawi.

Kum 74 lai ni ve tawh, khawvela hming dai ngai tawh lo tur  Dolly Parton chuan Guideposts magazine-in an kawmnaah zingkara a ṭawngṭai ṭhin thu hi a sawi chhuak a ni. 

"Engtin nge min hman theih ang? tiin Pathian ka zawt. Eng nge vawiinah ka tih dawn? tiin ka zawt bawk. Mi harhvang tak ka ni a, zingkar hma takah ka tho ṭhin. Chu chu ka ṭawngṭai hun a ni a, Pathian biakna atana hun awlsam ber pawh a ni. Thawm a awm lo a, a reh a, midang an la thawh loh avangin phone ri hriat tur a la awm lo a, email thleng thawm hriat tur pawh a la awm lo.

"Pathian nen chiah kan inbia a, ka awmdan tur ka zawt thei a ni. Duhthusam tam tak thleng dik thei lo tur khawpa tam rilruah a rawn lut. Engtin nge ka tih hlawhtlin theih ang? Engtin nge a lo thlen dik theih ang? Ka zirchhuah tak chu kan duhthusam thlen tura Pathian rin hi a ni. Eng nge thleng tur sawi lawk loin a thleng dawn a nih chuan a lo thleng mai zel," tiin a sawi a ni.

Dolly Parton hi chu hre loa bar kan awm awm lo e, kum 1967-ah daih tawh khan a album hmasa ber  'Hello, I'm Dolly' a tlangzarh tawh a, hetichung hian vawiin thleng pawh hian ṭhangtharte pawhin a hming hi chu an hre em em mai zawng a nih hi. Album a tichhuak hnem tawh hle a, 50 chuang zet tichhuak tawhin film lamah pawh a inlan nual tawh bawk.

Lehkhabu pawh eng emaw zat a ziak tawh a ni. Dolly hi tunlai milarte ang lo takin a pasal Carl Thomas Dean nen hian kum 50 chuang an innei tawh. Kum 1966 khan  Ringgold, Georgia-ah an innei a, fa erawh an nei lo a ni. Hetichung hian nupa inhmangaih tak an la ni reng a, kum 2016 khan an inneih champha kum 50-na pualin an nupain an inneih thutiam an tithar leh tih Dolly hian a lo sawi tawh nghe nghe.