Minute Khat Pheichham September thlaah

Sumdawnna 'idea' intihsiakna reality show hmasa ber 'Minute Khat Pheichham' episode pali chu September 1-4 chhung hian Zonet-ah tihchhuah a ni dawn.

'Minute Khat Pheichham' hi MZU Incubation Centre, MEDMOC leh Zonet ṭangrualin an buatsaih a ni a, Aizawl City Hall-ah intihsiakna shooting neih zawh tawh a ni. Nilaini aṭang hian Zonet Zawlbuk-ah zan dar 8-ah tihchhuah ṭhin a ni dawn a, September 4, Inrinni zanah intihsiakna tihchhuah zawh velah live telecast-in result an puang ang.

He show-in a tum ber chu sumdawnna lama ngaihtuahna, a taka chang thei a tam thei ang ber siam chhuah - 'business idea generation' bakah helam kawnga inzirtirna neih hi a ni. Nachang hre taka sum dek chhuak thiam 'Entrepreneur' te hi ram hnuk an nih avangin entrepreneur nih tumte cho chhuah chu an thil tum zinga mi a ni bawk niin show buatsaihtute chuan an sawi.

Event Solutions enkawl show a ni a, June thla chhung khan online-in dilna hun hawn a ni a, dilna 338 lai a lut. Diltute hian Final round thleng turin inthlitfimna ṭum hnih an hmachhawn a, chung aṭanga finalist 16 thlan chhuahte chu show-ah hian kan hmu ang.

Mizoram Consultancy Group chuan July 15 - 16 khan boot camp neih puiin finalist te'n hma an sawn theih nan an hrual a, March thlaa inpuahchah ṭan tawh ni mahse inkharphip vangin an duh hunah show an ṭan thei lo a, thla hnih lai hun remchang an dap hnuah August 18 khan freshers boot camp an nei thei hram a ni.

'Minute Khat Pheichhamah' hian endiktu mi pali an awm a, chungte chu- Rinzuala, Chairman Angel Business Promoters, Managing Director, MIZOFED; Malsawmtluangi, ZoWeave neitu leh bulṭantu; Dr. Samuel Lalnunzira Dingliana, Zoram Mega Food Park Private Limited, COO, Zote Bakery & Confectionery, MD leh Dr. Laldinliana Varte, Associate Professor, Dept of Commerce MZU, Director, MZU Incubation Centre, Doctor of Letters in Entrepreneurship Candidate, Fellow of Royal Statistical Society te an ni.

Minute Khat Pheichham lawmman:-
Pakhatna - Rs 1,00,000

Pahnihna - Rs 40,000

Pathumna - Rs 20,000

Finalist dangte chuan Rs 2,000 leh thuziak an dawng ṭheuh bawk ang.