iHeartRadio Music Award 2018 : Sheeran, Swift leh Cardi B te langsar

iHeartRadio Music Award chu March 11, Pathianni zan khan The Forum, Inglewood, California-ah asem a ni a, mimala langsar chu Ed Sheeran leh Taylor Swift te an ni. Puerto Rican singer - Luis Fonsi leh Daddy Yankee te chu category pasarihah an hming a lang a, no­mination hmu hnem ber an ni.

Award ceremony hi Ameri­can record producer DJ Khaled leh American model Hailey Baldwin te chuan an host a, show hi live-a pekchhuah a ni. English singer Ed Sheeran chu Male Artist of the Year atan thlan a ni a, a hla hit 'Shape Of You' chu Song of the Year atan thlan a ni bawk. American singer Taylor Swift chu Female Artist of the Year award hlan a ni a, American rapper Cardi B chu Best New Artist atan thlan a ni bawk. Award ngaihhlut hlawh dawngtu Cardi B, Ed Sheeran leh Taylor Swift te hi mimala langsar an ni a, show tihmuhnawmtu an ni.

Cardi B hian Best New Hip-Hop Artist award a humhaw bawk a, mimala che ṭha ber pawl a ni. A ni bakah hian tun hnaia chanchin ngah tak Liam Payne hnenah Best New Pop Artist award hlan a ni a, Bruno Mars leh Kendrick Lamar ten R&B Artist of the Year leh Hip-Hop Artist of the Year award-te an dawng. Bruno Mars hla hit That's What I Like chu R&B Song of the Year atan thlan a ni bawk.

American pop rock band lar Maroon 5 chu Best Duo/Group of the Year atan thlan an ni a, American heavy metal band Metallica chu Rock Artist of the Year atan thlan an ni. Tun lai hla lar chuai thei lo Despacito chu Latin Song of the Year atan thlan a ni a, Luis Fonsi chuan Latin Artist of the Year award a hum haw bawk.

iHeartRadio Music Award semnaah hian Cardi B leh Camila Cabello te perform in lawm an hlawh hle a, zaithiam dang eng emaw zan an perform bawk.