Spotify hmangtute'n Justin Bieber zai an ngaithla nasa ber

Canadian singer Justin Bieber zai chu Spotify streaming platform kaltlanga zai ngaihthlak tam ber a ni.

'Sorry' hitmaker hian Ariana Grande record lo siam tawh sa chu khumin tunah hian Spotify hmangtute'n a zai an ngaithla nasa ber a, Bieber-a zai hi chawhrualin thla khatah vawi maktaduai 83.3 vel zel an stream hem mai!

Ariana Grande chuan record lo siam tawhin, a zai kha thla khatah stream maktaduai 82 vel nei anga chhut a ni a, chu chu Bieber hian a rawn khum ta a ni. The Weeknd hlate chu vawi mtd 74.5 vel an stream anga chhut a ni a, Ed Sheeran hlate chu vawi mtd 72.4 vel an stream bawk.

TMZ-in an tarlan dan chuan tuna Bieber-a record ang siam thei hi zaithiam zingah an la awm loh bakah Spotify history-ah hetiang zat zat hi mimal zai stream a la ni ngai lo.

A album hnuhnung ber 'Justice' vang khan Bieber-a record hi a san phah hle nia tarlan a ni a, kha album kha Spotify hmangtute'n an stream nasa viau niin an tarlang.

Spotify hian kumin nipui chhung- May 29 aṭanga August 22 inkara an streaming platform kaltlanga hla stream tam an tarlan zingah pawh top 20-ah Bieber-a hla pahnih hi a lang hial. The Kid LAROI nena an sak 'Stay' kha parukna a ni a, 'Peaches' kha 13-na a ni bawk.

Hetihlai hian Olivia Rodrigo 'Good 4 u' chu nipui chhunga hla stream tam ber a ni thung a, Spotify chuan he hla hi 'Song of the Summer' tiin an sawi hial.