'Up' Star Ed Asner a thi

Pixar animated film, Oscar hial dawng thei 'Up'-a putar Carl Fredricksen voice actor Ed Asner chu kum 91 mi niin Pathianni khan Los Angeles-ah a thi.

Ed Asner hi Screen Actors Guild president hial lo ni tawh ṭhin a ni a, 'The Mary Tyler Moore Show' leh a spin-off series 'Lou Grant'-te chu a larpui niin TV show eng emaw zatah a inlan bawk.

Primetime Emmy Awards phei chu mipa performer zinga dawng tam ber ani hial a, pasarih lai a dawng a ni.

Kum 2003-a tihchhuah 'Elf' film-a Krismas putar lema chang kha a ni a, kum 2009-a tihchhuah computer animated film lar tak 'Up'-ah khan Carl Fredricksen voice actor kha a ni bawk. Kha film phei kha chu a hlawhtlingin sum pawh a lalut hnem rem rem hle a, 82nd Academy Awards-ah pawh Best Animated Feature leh Best Original Score award a dawng hial a ni.