Fashion Fusion 2018-ah VIFT Designers Meet
Vakiria Institute of Fashion Designing (VIFT) chuan kum danga a tih ṭhin angin a zirlai kal chhuakte pualin Fashion Fusion a buatsaih leh dawn. Kumin chu hetah hian an tawp dawn lo - VIFT Designers Meet an buatsaih dawn bawk a - March 20 & 21-ah Millennium Centre roof top-ah hun hman a ni ang.
Kumin chu zan lama fashion show neih mai a ni dawn lo a, chhun lam aṭangin designer-te kut chhuak a man tlawma zawrhna stall buatsaih a ni tel ang. Stall hi chawhma dar 11:00 aṭangin zan dar 9:00 thleng dawr theih an ni ang a, ei tur lam tur a awm reng bawk ang.
Mizorama fashion show a kum zawna kalpui rei ber ni tawh, Fashion Fusion hi VIFT chuan kum 2010 aṭang khan a kalpui ṭan a, VIFT-a zirlaite'n kum tluana an zirna aṭanga an zir chhuah thawmhnawte chu Mizoram top model-te'n an pholang ṭhin.
Designers Meet
Tun ṭumah hian Designers meet-ah hian VIFT aṭanga inzir chhuak tawh designer 10-te'n an kut chhuak an pholang dawn a, anni hian Millennium Centre chung zawlah hian ni hnih chhung an thawmhnaw an zuar ang.
He hunah hian Sangsangi Fanai, Zochhuani (Fashion Finder), Hriatpuia Pachuau, Teremi Ralte, St Nunui (Solomon's Closet),
Laldinga Hmar, Partei Chhakchhuak, Angu VHL, Jessica Sailung, Nu-i Hmar leh Mesz Khiangte-te'n an kut chhuak an pholang ang.
Anni hi VIFT aṭanga inzir chhuak vek an ni a, chhung lamah an kut chhuak an zuar chhuak ang a, man tlawm zawkin a lei theih ang. March 20 zan dar 7:00-ah anni collection pholanna fashion show neih a ni dawn. En man Rs 200/- niin Vakiria, Lalbuaia Shopping Complex, Zarkawtah lei tur a awm.
Fashion Fusion 2018
Kum 2010 aṭangaṭan tawh Fashion Fusion chu kum 2018-ah a hmel a danglam hret dawn a, March 21 zanah neih a ni ang. VIFT zirlaite'n kum tluanin designing leh garment construction an zir a, hengte hi a takin an pholang dawn a ni.
Fashion Fusion dang ang bawkin zirlai tiṭhate hnenah award sem a ni dawn a,; zirlaite kutchhuak thawmhnaw hrang hrangte hi model-te’n an pholan hma hian endiktu tura sawm fashion lama mi thiamte'n an endik vek dawn a ni.