Fashion legend Hubert a thi

French fashion designer Hubert de Givenchy chu Inrin­­ni khan kum 91 mi niin a thi a, a mu hlum nia tarlan a ni. A thih thu hi nemngheh a ni lawk lo a, The House of Givenchy chuan an puang chiang ta a ni.

Hubert hian nat lawkna em em pawh a nei lo a, a thihna hian fashion khawvel a deng chhuak hneh hle a ni. Fashion designing lamah hian sulsutu pawimawh tak a ni a, 'Fashion Legend' ti hiala sawi a ni.

Kum 1961 khan romantic comedy 'Breakfast at Tiffany's' chu tlangzarh a ni a, heta a changtu nu British actress Audrey Hepburn thawm­hnaw hak ''little black dress'' avangin hriat a hlawh hle.

Kum 1952 khan fashion label 'The House of Givenchy' a din a, hetaṭang hian khawvelin a hmelhriat chho ta a ni. Kum 1995 khan designing lam a chawlhsan a, a label pawh hi midang kutah a hlanchhawng a ni.

Tun thla tira Academy Award sem ṭum pawh khan 'Wonder Woman' star Gal Gadot leh 'Black Panther' actor Chadwick Boseman te chuan a label kutchhuak hi an inbel a ni.