JB-a leh Selena an in break?

Justin Bieber leh Selena Gomez te chu an inbreak niin khawthlang media-te chuan an sawi a, a chhan pawh Selena-i nu Mandy Teefey vang nia tarlan a ni.

Canadian singer JB-a leh Selena te hi hun eng emaw chen an inṭhen hnuah an inzui leh a, hei hi Selena-i chhungte chuan an duh lo hle. Mandy Teefey chuan an ni pahnih inzui leh hi a duh loh thu mipui hriatah pawh a lo sawi chhuak tawh a, tun ṭuma a in break chhan pawh hi amah vang nia tarlan a ni. US Weekly chuan, 'JB-a leh Selena te hian chhungte bula hun tam zawk an hman theih nan in ṭhen rih an remti a, a chan ber erawh Mandy vang a ni' tiin a tarlang. Selena hian a chhungte chu JB-a chungah rinna nghat ngam turin a hmin thei lo niin an sawi.

Selena leh Justin te hi February khan JB-a pa, Jeremy nupui neihna Jamaica-ah an kal dun a, hemi hnu hian an chhuak dun hmuh tur a awm ta meuh lo. Chanchin thar an neih leh chu an in 'Break' tih a ni ta daih a, hetih lai hian an mahni lamin thuchhuah an la nei lo thung. American singer Se­lena hi rilru lamah buaina a neih avangin rehab-ahte pawh a lo awm tawh a, tun ṭumah pawh a chhungte vang bawkin harsatna a tawk leh tawh niin media-te chuan an tarlang.