WWE Hall of Fame-ah Kid Rock

American singer Kid Rock chu World Wrestling Entertainment (WWE) Hall of Fame-ah lakluh a ni dawn.

Kid Rock hi sport lam a thlawp ṭhat avangin April thla khian Hall of Fame-ah hian lakluh a ni dawn a, a rual hian Dudley Boyz, Ivory, Jeff Jarrett leh Hillbilly Jim te pawh lakluh an ni ang. WWE star Triple H chuan hemi chungchang hi tun hnai khan a tarlang a, Wrestlemania 34-ah lakluh an nih tur thu a sawi. Kid Rock hi WWE-ah hian a thawh hlawk viau a, a track ṭhenkhat chu wrestler lar - Undertaker leh Stacy Keibler te pawhin an hmang. Stacy hian 'Legs' tih track chu arena a luh dawnah a play ṭhin a, Undertaker hian 'American Bad Ass' a play ṭhin bawk. 'New Orleans' track pawh April 8-a Wrestlemania 34-ah play a ni dawn bawk.

WWE Hall of Fame-ah hian mi lar tak tak - Snoop Dogg, Arnold Schwarzenegger, Mr. T, Mike Tyson leh US president ni lai Donald Trump te pawh lakluh an lo ni tawh bawk.