Black Widow tlangzarh hun tur sawn
Disney chuan kumin chhunga film chhuak tur zinga boruak nei lian ber zinga mi ni tura beisei, Marvel Cinematic Universe film Black Widow chu tlangzarh hun tur an sawn hla.
Black Widow hi May 1-a tlangzarh turin ruahmanna an siam a, a trailer hnuhnung berte pawh tichhuak tawhin film poster thar ber tura ngaihte pawh tichhuak vek tawh mah se Covid-19 darh zel vangin an sawn hla ta a ni. Engtikah nge an tlangzarh dawn Disney lam chuan an la tarlang lo bawk.
Black Widow stand alone movie turah hian Natasha Romanoff hun kal tawh tarlan a ni dawn a, Captain America: Civil War leh Avengers: Infinity War inkar vela thil thleng anga chan a ni dawn. He film-ah hian Marvel Comic fan-te lawmna turin Red Guardian pawh a lang dawn a, Taskmaster chu misual a ni dawn bawk.
Thawhṭanni hmasa kha chuan tlangzarh hun sawn a ni ve dawn lo niin thuchhuah siam mah se hripui leng hian ziaawm lam a pan theih loh avangin tiam chin awm loin tlangzarh hun hi an sawn hla ve leh ta a ni. MCU-ah hian Black Widow hi a lanna a rei tawh hle a, kum 2010-a Iron Man 2 aṭang khan a hmel kan hmu ṭan. Scarlett Johansson chuan hneh takin Romanoff role hi a play chho zel a, Black Widow tih lamrik rual pawhin rilruin Johansson hi a mitthla nghal zel tawh ti ila kan sawi sualin a rinawm loh.
MCU film dang dinhmun
Disney+'s series The Falcon and the Winter Soldier, WandaVision leh Loki-te chu production an chawlhsan hrih a, Marvel film buaipui mek- The Eternals, Shang-Chi and the Legend of the Ten Rings, Doctor Strange in the Multiverse of Madness leh Thor: Love and Thunder-te pawh production an chawlhsan rih. Heng film nghahhlehawm tak takte hi tlangzarh hun turah an tlangzarh hman dawn lo niin a lang.
Avatar 2 production chawl rih
Covid-19 chuan Avatar pawh a kalkan bik chuang lo niin a lang. New Zealand-a an chan tur chu an chawlhsan rih. Avatar executive team-te chu Zirtawpni liam ta khan Los Angeles aṭanga New Zealand pan turin an inruahman a, mahse an zin tur hi an ṭhulh leh ta rih a ni.
Avatar 2 hi December 17, 2021-ah tlangzarh tura ruahman a ni a, December 2023-ah Avatar 3 tlangzarh leh an tum bawk. Siam chhunzawm zel an tum a, December 2025-ah Avatar 4 tlangzarh tum bawkin December 2027-ah chuan Avatar 5 pawh tlangzarh leh hman an tum.