Bethsy leh Rosy te channa 'WHERE' tlangzarh a ni ta : Zaninah Lal Thanhawla Auditorium-ah chhuah a ni dawn
Mizo film, mihring hmanga sumdawnna lam tarlanna 'WHERE' chu nizan khan Saikuti Hall, Lunglei-ah tlangzarh a ni ta. Bethsy Lalrinsangi leh Rosy K Remsangpuii te channa film hi zanin dar 7:00 hian Lal Thanhawla Auditorium-ah chhuah a ni dawn.
Zanin bikah hian ticket hi Rs.500, 200 leh 100-te a ni dawn a, hmun hrang hrangah zawrh chhuah a nih bakah, a hmunah lei tur a awm bawk ang. Show hi dar 7:00 ah ṭan tur a nih avangin kal hma a fuh ang. Aizawl leh District khawpui ṭhenkhatah te show hi kalpui zui a ni dawn a, Zoram hmun hrang hrangah chhuah a ni ang.
Human trafficking film 'Where' hi Mizoram Thalai Krsitian Pawl (MṬKP) te siam a ni a, a tak taka thil thleng behchhana siam a ni. Mizo nula pahnih phaia hnathawk a awm bum chhuah an nih dan leh, an thil tawn rapthlak tak tak tarlanna a ni. Mihring hmanga sumdawng ten hnathawk tura mi an bumchhuah dan leh, chung miten harsatna an tawh nasa zia tih lan a ni. A thawnthuah hian sum tam zawk thawk chhuak thei tur anga thlem a, hmeichhia an bum luh dan chi dang pawh a tel a ni.
Bethsy & Rosy
A changtu zingah hian Mizo hmeichhe zaithiam lar - Bethsy Lalrinsangi leh Rosy K Remsangpuii te pawh an tel a, film siam lama hnuhma nei ṭha tak Mapuia Chawngthu (Leitlang Pictures) pawh a tel. 'Damna kim' film-ah pawh lo inlan tawh Bethsy hi hnamdang nula lemah a chang a, amah hi Roman Catholic niin, a bialpa erawh Kristian a ni lo thung. A bialpa hian hralh tumin a bei a, an buai chho ta nuai mai a ni.
Rosy chu misualnu ber lemah a chang a, a part a hnehsawh hle. Rosy hian a thuam inbel pawh a inhmeh hle a, zai chauh lo acting lam pawh a tithei viau a ni. Mapuia Chawngthu hi Police Inspector lemah a chang ve thung a, film siam chauh lo, a chan lam pawh a hneh sawh viau bawk.
Kuminah Mizo film chhuak thar sawi tur a la awm meuh loh avangin, 'Where' hi a hit hle tura ngaih a ni. A tam zawkah hian sapṭawng hman a ni a, chutih rual chuan sub-title hi Mizo ṭawnga dah a nih avangin buaina tur a awm lo. Shooting hi Mizoram chhung leh pawnah neih a ni a, vai ni awm tak tak hmel hmuh tur pawh a awm nual. Pawl leh mimal tan inhlawh nan a hman theih a, booking ti duh tan 9862658900 leh 8974243995-ahte biak theih a ni.