Live-stream concert pop star-te'n an intihhmuh

Covid-19 vangin concert leh show tam tak ṭhulh a ni a, zaithiam larte pawhin an show neih turte an cancel nasa hle. Hetiang boruak karah hian internet-in mitin a kaltlangna khawvela cheng kan ni bawka, zaithiam larte pawhin chu chu remchanga la in an fan-te hmuh theih turin social media lamah live-streaming in show an nei hlawm a ni.

Coldplay vocalist Chris Martin pawh heng zingah hian telin Instagram-ah live-in David Bowie hla Life On Mars-te a cover a, a fan-te zawhna zawhte pawh chhan nuam a ti hle.

Country singer Keith Urban pawh Instagram hmang ṭangkaitu zingah telin live-in show a nei a, darkar chanve zet show a nei a, guitar perih a zai pah bawk. A hnungah a nupui Nicole Kidman chuan lo ṭawiawm bawkin hmun an nuam dun nupa hle a ni. A pasal zai lai hian Kidman hi a lo inṭhehṭil vel a, an fan-te pawhin an lawm khawp mai.

Punk-pop singer Yungblud pawh a bang lo a, darkar khat zet show a nei. 'All of Me' hitmaker John Legend pawhin IG-ah mini concert a nei a, Miguel leh Charlie Puth-te chu ti ve turin a sawm nghal bawk. Instagram hmang ṭangkaitu zingah hian Christine And The Queens pawh an tel. Miley Cyrus pawhin darkar khat chuang zet Nilaini khan IG-ah a live a, Bebe Rexha leh Kesha-te pawh an bang chuang lo. 

Hripui leng vangin khawvel a chiai a, mahni ina tawm a him ber tih hriaiin milarte pawh an tawmim hle tih a hriat. Khawthlang milar zingah IG-a live hi an tam hle a, heng kan tarlan bakah hian mi dang tam tak pawh an la tel a ni.