Covid-19 vangin Bollywood industry-in sum hloh hnem dawn

India rama film industry lian ber Bollywood chuan Rs vaibelchhe 450 vel chu coronavirus darh zel vanga cinema hall khar a nih tak avangin an hloh dawn.

Sorkar laipuiin ram­chhunga cinema hall-te chu March 30 thleng khar tura a hriattir  avangin, Rs vbc 450 vel chu Bollywood-in sum an hai luh tur an chan phah hmel a, kum 2020 hi Bollywood box office tana kum lungchhiattlak a nih tur thu ramchhung media-te chuan an tarlang nasa hle.

Tunhnaia film hlawh­ting berte zinga mi Tanhaji: The Unsung Warrior chu kumin kumtira tlangzarh a nih aṭanga mite ngaihven rawn leh box office-a sum la lut hnem ber a rawn ni cho a, January thla chhung ringawt pawh khan Rs vbc 268.72 a hailut hman a ni. Mahse ramchhunga cinema hall-te khar a nih tak siah chuan he film pawh hian sum a lakluh zat tura beisei ang chu a lalut phak dawn ta lo a ni.