Femina Miss India 2018 : March 18-ah audition neih a ni dawn

Femina Miss India 2018 audition chu March 18 khian Big Bazaar, Shakespeare Point, Kolkata-ah neih a ni dawn. Miss India-a tel tur hian hmarchhak state pasarih te chuan an state ai awh tur an thlang fel tawh a ni.

Femina Miss India 2018 audition hi zone hrang hrangah neih a ni a, state 13-te chuan an state aiawh tur an thlang fel tawh a ni. Chung zingah chuan hmarchhak state pasarih - Arunachal Pradesh, Assam, Manipur, Meghalaya, Nagaland, Sikkim leh Mizoram-te an tel. Femina Miss India-ah hian contestant 30 awm tura ruahman a ni a, East Zone aṭangin West Bengal leh Sikkim-te chu golden ticket pek an ni dawn a, mi pakhat aia tam an tel thei ang. East zonal crowning ceremony hi March 22 khian Swissotel, Kolkata-ah neih a ni ang.

Hmarchhak aiawh turte
March 11 khan FBB Big Bazar Mall, Guwahati-ah Femina Miss India North East State Audition chu neih a lo ni tawh a, mi pasarih an tling. Miss Mizoram contestant Lily Lalremkimi Darnei chu Miss India Mizoram 2018-ah thlan niin, Miss India 2018 Finale-ah Mizoram ai a awh dawn a ni. Kum 21 mi Lily Darnei hi St. Edmund College, Shillong-a Chemistry zirlai a ni a, Miss Mizoram 2018 thlanna neih zawh takah khan top 5-ah a lang a ni.

Femina Miss India Manipur, Nimrit Kaur chuan an state ai a awh dawn a, Pramila Chettri chu Sikkim aiawh turin atling. Ṭnenawm state Meghalaya chuan MaryKhyriem chu an state aiawh turin an thehchhuak dawn bawk.

Arunachal Pradesh nula hmelṭha Osin Mosu chuan North East State Audition paltlangin Femina Miss India-ah a tel dawn tih a chiang tawh a, Ruopfuzhanov Whiso pawh Nagaland aiawhin a fehchhuak dawn. Hmarchhaka state lian leh mihring tamna ber Assam chuan Sunaina Kamath chu Femina Miss India 2018-ah hian an thehchhuak dawn bawk.

Femina Miss India Sikkim 2017 Roshni Ghimirey leh East Zone mentor Pooja Choprate chuan hmarchhak aṭanga tel turte hi duhsakna an lo hlan tawh a ni. Femina Miss India 2018 Grand Finale hi June thla khian Mumbai-ah neih a ni ang.