Selena Gomez a tal buai

Hringnunah hi chuan rahbi han rah tleu changte pawh a awm ve chawk ṭhin. Selena Gomez pawh chung zingah chuan a tel a, nikum lam aṭang khan a la che fuh thei meuh lo a, tunah pawh a la tal buai cheu.

Selena hi a kal thlak sak a ni a, amah lah chuan a thih phah ṭhelh niin a la sawi ta deuh deuh. American singer chuan, "Kidney transplant ka tih khan ka hlau thawng hle a, nunna chan mai tur ang hialin ka indah hman a ni" a ti. Hemi chungchang hi tun hnai khan a sawi a, a ṭhian leh laina hnaite puihna avangin lawmthu a sawi bawk.

Selena hi a bialpa hlui Justin Bieber nen nikum kum tawp lam aṭang khan an inzui leh a, ṭha taka bul ṭan leh tumin Biak In lam pawh an bel ngawrh viau. An pahnih hian Biak In ah ṭawngtai turin an kal ṭhin a, intihlim turin an chhuak dun fo bawk. Mahse a chhungte chuan JB-a nenan an inzui hi an duh lo hle a, a nu Mandy Teefey phei chuan vantlang hriatah nasa takin a sawisel a ni. Hei vang hian a nu nena an inkar pawh a chhiat phah hle.

Hetiang boruak vel a awm hnu hian Selena hian rilru lamah buina a tawk zui a, kar hnih chhung vel zet chu Rehab-ah a awm. Rehab aṭanga a chhuah hnu hian depression avangin a buai hle tih a sawi bawk. Tun hnai khan Justin Bieber nen hian an in break niin khawthlang media-te chuan an sawi a, a chhan pawh a nu Mandy Teefey vang bawk nia sawi a ni.

Hei mai hi a la ni lo a, a ṭhian ṭha ber Taylor Swift tour neih turah pawh a inlan ve dawn lo lehzel bawk. Hei pawh hi harsatna hrang hrang a tawh avanga a tal buai vang a ni a, Swift pawh hian May aṭanga "Reputation" tour a neih turah pawh Camila Cabello a thawhpui dawn a ni.