Depression nei ṭhin Lady Gaga
Bad Romance singer Lady Gaga chuan depression a lo hmachhawn ve tawh thu Paper Magazine-in an kawmnaah a sawi.
Paper Magazine chuan album a tihchhuah thar tur chungchangah Lady Gaga kawmna an nei a, he hunah hian Gaga chuan heng a album thar tura a hlate hi hun harsa tak a tawh laia a ziah a nih thu a sawi lang a ni. Gaga chuan "Hun harsa ka thawh lai chuan ka ngaihtuahnaah ka thih mai rinna hi a lian ṭhin hle a, mi ṭhenkhat chuan hlim turin leh thu ṭhate min fuih ṭhin a, mahse an thusawi chu ka ngaithla duh ngai lo.
"Hun harsa leh depression ka neihna lak ata talchhuah tuma ka beihna kawngah hian hlim hi a pawimawh tih ka hre chhuak a, thurawn min pe tute thu ka ngaithla a, ka dam reng tur a ni tiin ka infuih thar ṭhin ta zawk a ni," tiin a sawi. Gaga chuan amah anga hun harsa leh depression neive tawhte chu a album thar tur chu ngaithla turin a chah. He album thar tur hi Chromatica tih a ni a, heta mi hla pakhat Stupid Love chu kar liam ta Zirtawpni khan YouTube-a en theihin a dah tawh bawk. Chromatica hi April 10-ah a tlangzarh ang.