Box Office : 'Candyman' a tui ber lo maithei Mahse maw, a hlauhawm ber!

North America Box Office-ah kar tawp liam ta chhung khan 'Candyman'-in sum a lalut tam ber. Ryan Reynolds channa, kar hmasa lama pakhatna 'Free Guy' chu zalen takin mi chungah a leng ta bik loa, sum lakluh tam lamah 'Candyman' hi a pha ta lo a ni.

'Candyman 2' 'Candyman'
Supernatural horror film 'Candyman' tih chu kum 1992 khan tlangzarh a lo ni tawh, tuna Box Office roreltu 'Candyman' hi kha film chhunzawmna kha a ni a, kum 30 dawn a liam hnuah a chhunzawmna an siam chauh a ni.

Kar tawp liam ta chhung khan North America-a theatre 3,569-ah an tichhuak a, chutaṭang chuan $22,001,750 lalutin sum lalut tam ber a ni. Yahya Abdul-Mateen II, Teyonah Parris, Nathan Stewart-Jarrett leh Colman Domingo-te channa film hi $maktaduai 27 vel senga an siam a ni a, ram hrang hrang aṭanga a sum lakluh belhkhawm chu $27,297,750 tling tawhin an budget zat vel sum a hmu chhuak tawh.

Nikum June thlaa tlangzarh an tum daih tawh kha a ni a, mahse hri leng vanga vawi thum lai tlangzarh hun an sawn hlat hnuah Zirtawpni liam ta khan an tlangzarh ve ta hram a, kum 2019 kum tawp lamah kha chuan an chang zo fel vek tawh a ni.

'Candyman' hi film review-tu lamin an fak rawn a ni ber a, Rotten Tomatoes-ah phei chuan critics 228-in an review-na aṭangin rating 7.3/10 lai a hmu.

Zalen zo ta lo 'Free Guy'
Ryan Reynolds leh Jodie Comer-te channa 'Free Guy' chuan kar hnih chhung zet mi chungah zalen taka a len hnuah a ngam lo a tawng ta a, Box Office chart thar berah 'Candyman' hnuaiah a din a ngai ve ta.

Kar tawp liam ta chhung khan North America-a theatre 3,940-ah chhuah a ni a, $13,162,906 a lalut a ni. He film hian ram hrang hrang Box Office aṭangin $mtd 179.2 lai sum a lalut tawh a, a chhunzawmna pawh an buaipui leh nghal thuai dawn niin a lang.

'PAW Patrol: The Movie' chu sum lalut tam pathumna a ni a, 'Jungle Cruise' chu palina niin 'Don't Breathe 2' chu pangana a ni thung.

Flim thar, film thar
'An Egg Rescue' (13), 'Together' (18) leh 'Death Rider in the House of Vampires' (25) te chu film thar an ni a, kar tawp Box Office Mojo chart-ah film 48 tarlan niin film thar pali a awm a ni.