Kristian film : 'American Underdog' Krismas-ah tlangzarh dawn

Kristian film 'American Underdog' chu Krismas ni takah tlangzarh a ni dawn tih film siamtu Lionsgate lam chuan an puangzar ta.

'American Underdog' hi thil tak tak thleng behchhana siam a ni dawn a, NFL quarterback lar tak Kurt Warner-a chanchin a ni dawn a, a hmuhnawm ang. He film-ah hian Kurt Warner hi dawra thawka inhlawhfa ve mai ṭhin aṭanga NFL MVP vawi hnih lai ni thei, Super Bowl champion leh hall of famer a nih chhoh dan tarlan a ni dawn a, chhungkuaa en chi film ṭha tak a ni dawn tih a chiang.

A changtute an ṭha dawn
Hollywood film lar 'Shazam!' i en tawh em? a nih loh pawhin series lar tak 'Chuck' tal kha i en tawh em?

Heng film pahnihna a changtupa ber Zachary Levi chu Kurt Warner lemah hian a chang dawn.

Chumai a la ni lo, X-Men film i en tawh chuan 'Rogue' lema chang, Oscar award hial pawh lo dawng tawhtu Anna Paquin chu Warner nupui Brenda Warner lemah a chang dawn bawk. Chupawh chu a la ni mai lo, 'The Parent Trap', 'The Day After Tomorrow' leh Hollywood film lar tam taka sulhnu lo hnutchhiah ṭeuh tawh, 'The Guardian' chanchinbuin Academy Award nomination hmu lo zinga lemchan thiam ber zinga mi nia a sawi, Dennis Quaid chu American Football coach lar Dick Vermeil lemah a chang dawn bawk.

Chutichuan...
Lionsgate Motion Picture Group chairman Joe Drake chuan, "He film hi holiday season boruak nen pawh a inmil dawn hle. Rinna thiltihthehna, keimahnia awm thil ṭha ber khalh chhuaktu. Chhungkaw chakna. Chubakah, NFL championship season boruakte nena tarlanna tur a ni dawn," tiin a sawi a, chumi a nih avang chuan Krismas ni taka tlangzarh an tum ta tih a sawi bawk.

'American Underdog' hi Erwin Brothers (Jon leh Andrew)-te chuan an direct dawn a, Warner interview-na aṭang leh a memoir 'All Things Possible: My Story of Faith, Football and the First Miracle Season' behchhanin an siam dawn a ni.

Kingdom Story Company leh Lionsgate ṭangkawpin he film hi an buaipui a, anni thawkdun hian 'Jesus Music' leh 'The Unbreakable Boy' pawh siam mekin, 'The Unbreakable Boy'-ah hian Levi hi a chang leh bawk ang.