Avengers: Infinity War trailer thar a chhuak : Box office-ah record a siam nghal

Avengers: Infinity War chu April thla tawp khian tlangzarha ni tawh dawn a, Marvel Entertain­ment chuan kar kalta Zirtawpni khan a trailer thar pawh an tih­chhuak leh tawh. Avengers chhuak thar tur hian tlangzarh hma hauha ticket book lawk tam lamah Box Office-ah record a siam der.

Avengers: Infinity War hian presale ticket-ah Black Panther leh Batman V Superman: Dawn of Justice-te a khum. A khum sa tliah a ni lo a, darkar ruk chhung lekin a khum a ni. A hit dawn tih a chiang tawh a, sum lakluh tam lamah record a siam thei ang ngem tih chu hriat chakawm tawh tak a ni.

Infinity War-a changtute hi an hrawl hlawm hle a, tunlai Hollywood actor lar tak takte an inlan. American actor Robert Downey Jr. chu Iron Man lemah a chang leh dawn a, a chevel hmuh a chawkawm tawh hle.

Jurassic World sawi a pianga mitthla lo lang ṭhin Chris Pratt channa film hi dah hniam chi a ni lo. Guardians of the Galaxy-ah pawh lo inlan tawh Chris Pratt hi Star-Lord lemah a chang leh dawn a ni. American actor dang Chris Evans leh Josh Brolin te pawh an inlan a, Chris Evans hi Captain America lemah a chang a ni.

Heng bakah hian Australian actor Chris Hemsworth leh English actor Tom Holland te pawh an la awm cheu bawk. Hmeichhe lamah chuan Ameri­can actress pian nalh leh hmeltha Scarlett Johansson pawh sawi hmai chi a ni lo.

Film khawvela hnuhma nei ṭha tak tak channa Avengers: Infinity War hi United Kingdom-ah chuan April 26 khian Cinema-ah chhuah a ni dawn a, April 27 aṭangin khawvel hmun hrang hrangah chhuah a ni ang.