Hontrade Ṭhazual Lengzem : Jenny Jathang leh F. Zomuanpuia an langsar

Jenny Jathang chuan Hon­trade Ṭhazual Lengzem chart-ah a ṭum khat nan pakhatna a hauh a, a hla 'I hlui thei mawlh lo' chu thlan hlawh ber a ni. Hetih lai hian F. Zomuanpuia chuan top 10-a lang pha hla pahnih neiin, tun ṭum chart-ah hian a langsar hle.

Jenny hi chart-ah vawi eng emaw zat a hming a lo lang tawh a, tun tumah hian dinhmun sang ber a rawn luah a ni. A hla hi Dina Jathang phuah a ni a, tunlai lengzem hla tam tak zinga thlan hlawh ber a ni mek. Tun ṭuma mi hi a music video pakhatna a ni a, kumin January thla khan a tichhuak a ni. Heti chung hian a hit rem rem hle a, pakhatna a nih hma hian chart hmasa lam khan pahnihna te pawh a lo hauh tawh a ni.

Ṭum dang ang bawkin F. Zomuanpuia a langsar leh a, top 10-ah a hla pahnih - 'Lung a leng em mai' leh 'Lo let leh la' tih te chu an lang. F. Zo­muan­puia hian pahnihna leh pasarihna a hauh a, lengzem huangah chuan a mikhual lo hle. HT Lalthanzami nen an sak "Hmangaih mengmawite' tih chu chart-ah hian pakhatna a lo ni tawh bawk. Top 3-ah hian HT Lalthanzami pawh a lang leh a, a hla 'Ka hmangaih che a sin' tih chuan thlan a hlawh chho mek. Top 5-ah hian Lalramdini Fanai leh H. Lalvulmawia te an lang bawk.

Tun ṭumah hian chart-a pakhatna pawh lo hauh tawh Janet-i chuan 'Ka lal fapa' tih hla hmangin parukna a hauh a, Kimkima 'Sarah, I zun zam' chu pariatna a ni. Tommy L Pachuau pawh a rawn inlar leh ṭan a, 'Tawnmang Lasi' tih hmangin a sang 10 zingah a inhlangkai.