YouTube Fanfest Creator Camp-ah Alan Rinawma a tel

Khawvel ram hrang hranga neih ṭhin YouTube Fanfest chu India ramah pawh kalpui mek a ni a, he hunah hian YouTuber ṭha ber ber an fuankhawm ṭhin. Chung zingah chuan Mizo Dance Camp (MDC) creative director Alan Rinawma pawh sawm zingah a tel a, Delhi-a March 16-17 chhunga neihah khan a tel a ni.

YouTube Fanfest hi kumtin buatsaih ṭhin a ni a, India-ah buatsaih a nih hma chiah hian South Korea-ah buatsaih a ni. India ram khawpui lian - Mumbai, New Delhi, Chennai leh Bengaluru ahte neih zui a ni. Fanfest-ah hian show bakah YouTuber-te tan creator camp buatsaih ṭhin a ni. Creator camp-ah hian youtuber ṭha zual leh lar chho zel tura beiseiawmte sawm an ni a, chung zingah chuan Alana pawh hi a tel a ni. New Delhi leh Mumbai ahte Creator Camp hi neih niin, Chennai leh Bengaluru ah chuan show chiah neih a ni thung.

YouTube Creator Camp India-ah hian panel session-te leh breakout session bakah motivational speech-te a awm a, YouTube headquarters California atangin Manager chuan YouTube hmang ṭangkai a, eizawn nana pawisa hmuh tam leh zual theih dan tur hrilhhriatna hun a hmang a ni. Creator camp-a YouTuber kal khawmte hi Sprite company nen thawh hona chance siam sak an ni bawk.

Panel session-ah hian Indian YouTuber hlawhtling tak takte leh millionaire hial lo ni tawh ten training an pe. Mumbai-a Fanfest India Final show neih turah pawh khawvel huapa YouTuber lar - Matt Steffanina, The Gabbie Show leh America's Got Talent-ah pawh lo tel tawh YouTuber lar Collins Key te chu perform turin an lo kal dawn bawk a ni. Mizo zingah pawh YouTube creator kan pungcho zel a, mi tam takin YouTube hi sum lak luh nan kan hmang tangkai chho zel bawk.

Alan Rinawma pawh hian YouTube-a a choreography video ṭha tak tak avangin hriat a hlawh chho mek a, mihring tamna India ṭhalai zingah pawh sawm bik zingah a tel pha a ni. Alana chuan, "YouTube channel kan neih chuan original content kan ngai pawimawh tur a ni a, midang content leh video siam sa kan upload chhawng mai mai tur a ni lo" tiin, Vanglaini palai a hrilh. Hei bakah hian Mizo mipuite chu Mizo YouTube channel hlut sak leh zual turin a sawm bawk.