Box Office : Tomb Raider tukdawl zawh loh Black Panther

Tun hnaia film tlangzarh hrawl ber chu 'Tomb Raider' a ni a, Box Office-ah pawh che ṭha nghal viau tura beisei a ni. Hetih lai hian American film director lar Ryan Coogler film siam 'Black Panther' chu a la tukdawl pha chuang lo a, kar nga chhung zet chu North American Box Office-ah roreltu ngaiin ro a rel ta.

Black Panther hian kar liam ta chhung khan US-ah ringawt $mtd 27 a lalut leh a, tihian a sum lakluh tawh zawng zawng chu $mtd 600 chuang zet a ni tawh. Black Panther hian 'Avatar' record lo siam tawh chu a nih rual chiah a, kum 2009 hnu lama Box Office-a a zawna kar nga chhung sum lalut hnem ber ni leh thei hmasa ber a ni. Record thar siam thei dinhmunah a ding mek a, chutih rual chuan amah hnaih bertu 'Tom Raider' chet ṭhat chhoh danah thui tak a innghat bawk.

Fantasy/action film Tomb Raider hi March 7 khan tlangzarh a ni a, theater-a chhuah a nih hma hauh aṭangin boruak a nei lian hle. Swedish actress Alicia Vikander channa film hi sum lakluh kawngah pawh che ṭha hle tura beisei a ni a, chutih rual chuan beisei pha loin $mtd 23.5 chiah a lalut. Beisei a pha lo sa tliah a ni lo a, Lara Croft lema chang Vikander chuan beih leh sawisel a tawk nasa hle. A role a hneh tawk lo tih te, a cher lutuk a, a sexy tawk lo bawk tihte chu an sawiselna langsar zual a ni. Hnehsawh taka Lara Croft lema lo chang tawh Angelina Jolie a tluk lo niin an sawi bawk.

Box Office-a sum lalut tam pathumna chu 'I Can Only Imagine' niin, a sum thawhchhuah zat chu $mtd 17.1 a ni. Tun thla tira tlangzarh 'A Wrinkle in Time' leh 'Love, Simon' chu sum lalut tam panga zingah an tel. Box Office-a che ṭha - Peter Rabbit leh Jennifer Lawrence channa Red Sparrow-te chu sum lalut tam zual zingah an la tel cheu bawk.